Egongalo Omuntele lya gwanitha omimvo omilongo ntano

0
260

OMUNTELE – Mosoondaha ya ziko olyali esiku lyopandjokonona megongalo Omuntele, sho lyali lya dhana oshituthivalo shegongalo ndika konima sho lya gwanitha omimvo omilongontano (50)

Poshituthivalo shika shegongalo opwali pwa kalwa komundohotola Shekutamba V.V Nambala ngono eli omvalele yegongalo ndika,omusita Frans Imene, Halolye Nashihanga,Eino Nangula naye omvalele yaMuntele oshowo yamwe po yomaanangeshefa mboka ya valelwa megongalo ndika.

Omumbisofi Nambala  sho ali a pewa ompito a popithe aakwanegongalo okwati yo onga ongeleka ya ELCIN otaya hambelele no ya nyanyukwa okuuva kutya aakwanegongalo yegongalo ndika ohaya holoka aluhe kelongeloKalunga, taye ya tsu omukumo opo kaaya se uunye ,moku longela Kalunga.

Aakwanegongalo oyali ya holoka momwaalu omunene opo yalye koshikuki shegongalo. Kaino Akwaake  ngono a gandja ondjokonona yegongalo okwati egongalo ndika Omuntele olya totwapo mo 1964 sho lyazi kondjakulwambinga ya Nyaanya,olyali nee mewiliko lyomusita Juuso Shikongo pethimbo ndiyaka.

“ Nonande aluhe ihashi kala oshipu petameko elongeloKalunga  olyali hali ningilwa momatsali ga dhikwa niihwa nokonima sho omwaalu gweende tagu koko aakwanegongalo oyali ya tokola ya tunge ongeleka yawo noondhopi dhevi noyali yina iipundi yomukanga,iilyo yongeleka yetu ya ningi oyindji no twa tokola opo tu tunge ongeleka ndjika yo aakwanegongalo yetu ya vule oku ningilwa elongeloKalunga Osoondaha kehe,” Akwaake tati.

Egongalo ndino olya wilikwa kaasita ngaashi Joseph Kapewangolo, Matias Nepela, Jairus Uugwanga , Festus Mvula oshowo omusita Ngeteya Ashipala. Ongeleka ompe sho yapu ku tungwa oyali ya yapulwa komumbisofi pethimbo ndiyaka Kleopas Dumeni momilongo hetatu (1980). Nopethimbo ndika egongalo Omuntele otali wilikwa komusitagongalo Markus Hango

Monena Omuntele egongalo lyiithikamenapo kulyo lyene lina oondjakulwambinga omulongo nane (14) iilyo (8209). Egongalo ndino olya totwapo muuyuni wElenga enene, omunagwokombanda  Shiliva sha Nehale lya Mpingana. .

Meme Kaarina Shaningi okwati oya tokola opo ya dhane oshituthivalo shegongalo sho lya gwanitha oomvula omilongontano mu lyotango lya Kotoba, yo ya nyanyukilwe pamwe naakriste ooyaakwawo. “ Elalakano enene lyoshituthi shika shenyanyu oku gongela oshimaliwa tu vule ku opaleka ombinga yimwe yongeleka yetu ndjono ya kulupa no ya pumbwa ku opalekwa,onkugo yetu osho yu uvika aakwanegongalo yegongalo lyetu oya tokola opo ya gongele oshimaliwa esiku ndika lyonena yo yi vule ku opalekwa,” Shaningi ta gwedhapo ngaaka.

Esiku ndyoka Ongundulwiimbo Halleluya yomOmuntele oyo yali tayi mwenyeke oshituthi noondjimbo ,omayimbilo gomahalelo omawanawa ogali tag a dhana onkandangala naakwanegongalo oyali ya nyanyukwa noonkondo.

Elongelokalunga Osoondaha ndjoka olyali lya ningwa komusita Eino Nangula na Tomas Uushona omanga euvitho lya ningwa kOmuwiliki mbiisofi Nambala. Konyala aakwanegongalo mboka yali ya gongala mono mwa kwatelwa kansela gOmuntele oyali yaningi omauvaneko gawo noyendji oyali ya gandja oshimaliwa shomwaalu omunene opo ombinga yimwe yongeleka yi opalekwa.

Yamwe po mbono ya valwa omvula yo 1964 oyo yali ookadhenga kesiku, sho ya longekidha omagano gatya shoo yo ye ga etele ongeleka ndjika mevalo lyawo. Enyanyu enene olyali po esiku ndyoka oshoka noohembundangele oyali ya gongala nawa. Egongalo alihe olyali lya topolelwa uuleke wevalo.

Egongalo Omuntele olyo yina yomagongalo ngaashi Onakazizi, Uudhengelo oshowo onkelo yawo Ondjamba. Omagongalo gopuushinda nago ogali geya ga tyapule evalo go ga hempe okanona sho ka koko nawa.

LEAVE A REPLY

Please enter your comment!
Please enter your name here