Egumbo lyegongalo lyaNayena osho lya egululwa pambelewa

0
341

ONAYENA –  Konima yomvula yimwe sho aakwanegongalo yegongalo lyaNayena yali yayi moonkundathana dhopetameko ,nkene yena okutunga egumbo lyawo lyegongalo no kuli opaleka, nonande ka shali oshipu, osho yeshi pondola.

Molyomakaya ya piti okwali kwa egululwa egumbo ndika pambelewa naashino oshali sha ningilwa pongeleka yaNayena Egumbo ndino otali monika lya tungwa pashinanena.

Gumwe gwomokangundu longekidhi kesiku Justus Haikali okwa holola kutya egumbo ndino olye ya kotha konyala oshimaliwa shaadha lopetata lyomiliona yimwe. “Egumbo ndino olina oondunda odhindji mono mwa kwatelwa dhokulala (4),okombitha,ombelewa yomusita mono omusita ta vulu ku longelamo konima yiilonga,ehala lyokuvululukila,ehala lyokupungulila iinima ,oshinyanga sho ku lila oshowo oyindji yilwe,”Haikali ta ti ngaa.

Konyala oondunda adhihe dhili megumbo lyegongalo Onayena odhina omadhina, mono oombushe yali yeya esiku ndyoka ya kwata no ku zaleka oombushe iiteta. Kansela goshikandjohogololo shaNayena Max Nekongo naye woo okwa lukilwamo ehala lyokuvululukilwa ndyono eli opaleka nawa. Nekongo okwa landelemo iinima ayihe tayi pumbiwa mehala muka ngaashi oTiivi,omatyofa gongushu uutaafula oshowo uusikopa nayilwe.

Mu yamwe mbono ya lukilwa dhimwe dhomoondunda dhomegumbo ndika ongaashi Abisai Nendongo a lukilwa ombelewa ndjoka nayo eyi landele iinima ayihe hayi longithwa pambelewa nuuna omusita a zimbuka ota vulu a longithe ombelewa ndjika oshoka aakwanegongalo yamwe ohaye ya ya kwathwe konima yiilonga.

Okombitha oya lukilwa Naeman Hamalwa,oshinyanga shokulila osha lukilwa Jerry Imene, ompungulilo oya pewa tatekulu Toivi Nambala omanga oombelewa oonene ndhono dha simana megumbo (uundjugo) wa lukilwa Justus Haikali na Abner Shikulo. Oondunda dhokulala odha lukilwa Joshua Amukugo,Nicky Uugwanga, Shivute Indongo na ndohotola Nicky Nashandi.

Egumbo ndino alihe olya lukilwa omundohotola Nickey Iyambo ngono eli oye omunani gwegumbo. Minista Iyambo ta indile egumbo ndika li kale tali longithwa pauyuuki. Esiku ndyoka naye okwali a holoka ye a tale mbushe nkene eli. Omundohotola Shekutamba V.V Nambala pethimbo ta patulula egumbo ndika pambelewa okwa indile opo egumbo ndika li kwatwe nawa lyo li adhike komapipi gokomeho.

“ Onda hala okumu tseyithila mpano nena kutya egumbo ndika kalishi lyomusita oye awike nenge lya ngandi ashike egumbo lya kehe, nali longithwe komukwanegongalo kehe lyo nali longithwe puuwanawa wegongalo, otandi indile li silwe oshimpwuyu ethimbo kehe lyo li kale no ku opalekwa oshoka iinima oyindji yoshigwana ohayi longithwa nawa, “Omundohotola Nambala tati ngaaka.Okwa tsikileko kutya uuna megumbo omo tuu muka mwa holoka sha nashi lopotelwe mbala egongalo lyo li tale kutya otali ningipo shike oshoka oyo yeli thikamekapo. Omusita gwegongalo Nikanor Shuukwanyama okwali a pandula ayehe mboka ya longa oshilonga sha simana opo egumbo ndika li thikamepo lyo li vule ku longithwa komukwashigwana kehe.

LEAVE A REPLY

Please enter your comment!
Please enter your name here