MVA a gandja omagano kOnyose Trust

0
233

ONDANGWA – Metine lyoshiwike shaziko ehangano lyOnyose Trust olyali lya pewa omagano kehangano ndyoka hali kwathele mboka ya monena iiponga moondjila  nomiiyenditho (MVA). Shino oshali sha ningilwa mOvenduka.

Omagano ngaka ogena ongushu yoshimaliwa shooN$40 000 mono mwa kwatelwa oombete dhiipilangi, omatanga gokwiidheula niilongithi oyindji mbyono tayi kala tayi longithwa pethimbo lyomadheulo mehangano ndika lyOnyose.

Onyose Trust ehangano ndyoka inaali yama kepangelo, nolundji ohali kwathele aantu mboka taya lumbu nuulema, mboka ya pumbwa omadheulo gopalutu,okukwathela mboka ya pumbwa omahungomwenyo,okulonga uunona okuza petameko kombinga yuulema  noshowo okuetapo iiyemo yilwe tayi vulu ku yambidhidha aanuulema.

Kuyelele wa gandjwa ku Mona –Liza Garises omuniilonga mehangano lyo MVA ,okwa ti oya tokola opo ya gandje omakwatho giilongitho mbika tayi kala tayi longithwa mokudheula aanuulema naamboka yeli mompumbwe.

“ Konyala ngaashingeyi otwa adha esindano sho twa kwathela shimwe shomiiputudhilo yaamboka yena omaulema, otwa gandja oshimaliwa shooN$100 000 opo yi ka kwathele moku ninga oshituthi shepito no shoku gandja oonzapo,otwa gandja woo oshimaliwa shomiliona oshinkwanu mbali (1.2)million, shi ka kwathele mwaamboka ya monena iiponga moondjila,otwa adha esindano miinima oyindji  no tatu tsikile noku kwathela mpoka tatu vulu,” Garises ta ti ngaaka.

Ebenecia Tjiveta omukwateli komeho gwOnyose Trust pethimbo ta taambako omagano ngaka ya pewa ku MVA,okwa holola olupandu lwe sho ya yambidhidhwa niilongitho yongushu yoshimaliwa shoka. Okwa ti ehangano lyo MVA olya longa oshilonga sha simana mokukwathela aanuulema mboka olundji nopendji ye wete ya dhinika nonande shika hasho.

“ Otuna einekelo kutya iilongitho mbika otayi ka gandja omauwanawa kaanona yetu momikalo nopoompito odhindji,iilongitho mbino otayi ka eta elunduluko enene okugandja omadheulo kwaamba ye ga nuninwa oshoka otwa hala tu dhane onkandangala moonkalamwenyo dhaanuulema yetu,” Tjiveta ta gwedhaspo nga. MVA ta uvaneke ta kala noku kwathela omahangano niiputudhilo mbyono tayi dheula aanuulema noku ya longa opo ya vule ya yambulepo oonkalamwenyo dhawo, yo  ya mone esiloshimpwiyu ewaanawa.

LEAVE A REPLY

Please enter your comment!
Please enter your name here