Omufekelwa iidhipaga manga ta tidhwa kopolisi

0
454

ONDANGWA – Omulumentu omugundjuka okwiidhipaga omanga a li ta fadhuka po okukwatwa kopolisi. Oshiningwanima shika osha ningwa ongulohi yEtiyali oshiwike shika mOndangwa.

Otaku hokololwa kutya omufekelwa nguka taku tengenekwa ena omimvo 20 nenge opo a gwanitha 30 okwa nuka mo mosheenditho moka ye naafekelwa ooyakwawo ya li ya londa mokukambadhala ya fadhuke po opolisi nokwa tameke anuwa ta umbu opolisi ndjoka ya li ye mu tidha. Elago enene ooholo dhondjembo ye inadhi kwata nando omupolisi gumwe gwaamboka ya lita ye mu tidha.

Opolisi oya hokolola kutya omufekelwa sho a mono omagulu ge itaaga vulu we okumufala kokule naapolisi , okwa nukile megumbo limwe li li popepi nOmatala gokulandithila mOndangwa. Molugumbo lwegumbo ndyoka okwi iyahelemo nokwa sile mpoka pahapu dhopolisi.

Otaku fekelwa kutya omulumentu nguka oye gumwe gwomaalumentu yatatu mboka ya li ya yugu ositola yedhina Omo Store poongeshefa dhopUuhama moshikandjohogolo Onyaanya moshitopolwa shaShikoto. Eyugo ndyoka okwa li lya ningwa ongula yesiku ndyoka lyEtiyali oshiwike shika. Aafekelwa mbaka oya li ya yugu omulandith mositola ndjoka oodola N$32 000 anuwa noongodhi dhopeke dhili  ndatu konima yokutilitha aalandithi positola ndjoka noondjembo.

“Aapolisi ooyakwetu mOshikoto oye tu lombwele kutya oya landula oombudhi ndhoka dha yugu ongeshefa moshitopolwa shoka ndele odha fadhuka po dhuuka ombululu yokOshana,”  Omugandjimalombwelo gwopolisi mOshana Kommishina Ndahangwapo Kashihakumwa okwa lombwele aatoolinkundana pehala mpoka omufekelwa iihulitha ko. Opolisi yomOshana  oye shi pondola okuaadha aafekelwa mbaka  puuholameno wawo mOndangwa.

Oya kambadhala ihe okufadhuka po nosheenditho, ndele pehala limwe sho omufekelwa ngiika a mono kutya onda po yosheenditho oshona kwaandjoka yoompadhi dhe, mohauto okwa nuka mo eta matuka koompadhi omanga tuumbu opolisi ndjoka ya li miihauto oshowo mboka ya li kolupadhi, ihe kegameno lyaMwene gwEshito aapolisi ayehe kapena nando ogumwe a kwatwa kooholo dhomufekelwa ngoka, pahapu dhaKashihakumwa. Aakwashigwana wo yamwe mboka ya litaye mu tidha nayo ina ya mona oshiponga nando, kiikuti ye mbyoka. Omufekelwa anuwa okwa nukile megumbo lyaNekoto Jeconia, moka anuwa a indile aanegumbo mboka ya li pondje ya mwene. Gumwe gwaanegumbo anuwa okwa ulike kutya oshi li nawa, ndele konima oya uvu omitopelo mbali dhondjembo.

Omufekelwa anuwa okwiiyaha lwaali. Oholo yotango oye mu huya ashike omanga ontiyali oya pitile momutse etayi tyuukile pombanda yagwo. Okwa hulithile mpoka iiyahele.

“Onduuvu ashike aanegumbo taya hokolola kutya molugumbo lwetu omuna omufuthi. Onda tondokele kondunda yandje ndika tale ndjembo sho nda galuka ondaadha nale omufekelwa a lala a sa omanga olugumbo lwegumbo aluhe olwa li lwa kundukwa koshigwana oshindji,” Jeconia Nekoto ngoka oye mwene gwegumbo moka mwiidhipagele omufekelwa osho a hokolola ngaaka.

Iilyo yimwe yomoshigwana oya hokolola kutya omufekelwa ngoka okushiwikile nawa iilonga yomiyonena, taya tsikile kutya oye ta fekelwa a li gumwe gwaalumentu mboka ya li ya yugu ombaa pomudhingoloko gwopopepi naampoka iidhipagele. Aafekelwa yakwawo yaali oya li wo ya kwatwa  konima ashike sho nguka iidhipaga.

LEAVE A REPLY

Please enter your comment!
Please enter your name here