Ondjodhi yaaniiyemo iishona osho yatsu

0
223

OMUTHIYA – Aaniiyemo iishona mondoolopa Omuthiya oya nyanyukwa oshoka ngashingeyi otaya vulu okuitungila omagumbo gawo moshilando shoka.

Aakalimo yomondoolopa ndjika oya ulike enyanyu lyawo oshiwike shayi pethimbo ya li ya tseyithilwa kutya oya pewa ehala moshilando shoka kewiliko lyasho opo ya tungepo omagumbo gawo .

Etitano lya piti olya li esiku lyowina lya longekidhwa kelelo lyondoolopa yaMuthiya opo li ye li tuleko ondhopi yotango sho omagumbo ngoka gaaniiyemo iishona taga tamekwa okutungwa. Etameko lyetungo lyomagumbo ngaka olya li lya ningwa konima sho elelo lyondoolopa ndjika lya li lya pe aakalimo yomoshilando shika mboka haya mono iiyemo yi li pevi ehala mpoka taya  tungu omagumbo gawo. Ehala ndika  elelo lyOmuthiya olye li gandja itaali landwa nenge itaali futilwa sha.

Victoria Nepembe ngoka eli omupopiliko gwehangano lyaantu mboka ya pewa ehala ndika okwa holola kutya ehangano lyawo ndyoka tali ithanwa Tuhafeni olya totwapo mo 2012, nopetoto lyaylo olya li ashike niilyo yili 10, ashike omwaalu ogweende tagu londo guuka pombanda ethimbo kehe. Oyendji yomwaamba ya pewa omahala ya tunge omagumbo gawo pehala mpoka oyo aakiintu.

“ Otwa li twa pewa omadhiladhilo omawanawa ku Penny Shikongo ngono twe ga landula sigo twa adha esindano, otwa li twa kundathana na Penda ya Ndakolo pethimbo a li kansela gwetu gwoshikandjohogololo Omuthiya no kwa li e tu uvanekele kutya ondoolopa yOmuthiya sho tayi ka tungwa pamuthika gondoolopa otse yotango tatu ka pewa evi tu vule ku tunga omagumbo getu,” Nepembe ta ti.

Okwa gwedhapo kutya ondjodhi yawo osho ya ningi yoshili nonande ya kala yafa taya yaguma, iilyo mbika yili kohi yehangano lyaaniiyemo iishona (shack dwellers federation) oyendji oyo mbyoka hayi landitha uushikependjewo pomatala no haya mono iiyemo iishona. Ta holola kutya oyendji oha ya zi muumbashu na yamwe ohaya lala momahala ngoka ya hehela no ha ye ga futile omwedhi kehe.

Nepembe okwati ehala ndyoka ya  pewa kElelo lyondoolopa yaMuthiya olya thaanekelwa li tungwe omagumbo geli 137 oshowo ehala lyomaudhano (play ground).  Okwa tengenekwa onkatu yoshiluku shotango shetungo lyomagumbo mpaka yi kutheko manga omagumbo 29 ngono geli nale metifa lyokutungwa. “ otuna edhiladhilo omagumbo ngano ga tamekwa ku tungwa ga kale ga pwa mu Januali omumvo ta guya tse tu tunge ishewe gonkatu ontiyali,ehala otweli opaleke tse yene, tatu li kokola noondhopi otse yene twedhi tholoma oshoka okwa tiwa iilonga ihayi li omuntu,”  tati ngaaka.

Omunambelewa mombelewa yoshitopolwa shaShikoto Samuel Shivute okwa ti shika oshi li ondjokonona mondoolopa yOmuthiya , sho aaniiyemo iishona ya pewa evi omagano opo ya tunge omagumbo gawo, tati oyena edhiladhilo mondoolopa yaMuthiya kaa mu kale nando uumbashu monakuyiwa.

“Shino osha hala kutya aanambelewa yomomalelo gi ili, kayeli owala moombelewa ya kuutumba ya mwena ashike otaya ende noku tala shoka aakwashigwana ya pumbwa opo ye shi tule pomuthika omuwanawa, otandi pandula aaniiyemo iishona mbaka sho ya longo nuudhiginini no ya mono kutya osha pumbiwa opo ya pewe evi ya tunge omagumbo gawo,” Shivute ta gwedhapo ngaaka.

Ondhopi yotango opo iilonga mbika yi tamekwe oyali ya tulwapo komugandji mayele gowina moshitopolwa shaShikoto Aino Kapewangolo. Kapewangolo okwa indile opo mbaka taya longo iilonga mpaka ya longele kumwe. Aaniiyemo iishona mbaka oyali ya nyanyukwa noonkondo kwaashoka sha ningwapo.

LEAVE A REPLY

Please enter your comment!
Please enter your name here