Oshigongi shehangano lyaawiliki yoonzo dhopantu nuumvo

0
176

ONGWEDIVA – Epulo ngele okuninga omakanka oko ondjila yotango nenge ya hugunina ndjoka aaniilonga taya vulu okulandula opo ya thiminike mawiliko giilonga yawo okuya gwedhela omwaalu omuhwepo olyo limwe lyomiikundathanwa poshigongi shehangano lyaanawino moonzo dhaantu tashi kala ko oshiwike tuuka.

Shika osha tothwa mo ku Tim Ekandjo omuperesidende gwehangano ndyoka moshitakumi hali ithanwa Institute of People Management, pethimbo a tseyitha kutya  oshigongi shokomumvo shehangano ndika otashi kalako oshiwike tuuka moVenduka.

Ekandjo okwa ti oshinima shiipotha yaaniilonga moshilongo otashi ka kundathanwa pokati kaawiliki yaaniilonga naawiliki yopombanda yomahangano unene tuu sho pethimbo ndika Namibia eli meshongo lyaaniilonga taya ningi omakanka omolwa okwaa uvathana kombinga yomagwedhelo goondjambi nomauwanawa galwe miilonga.

Oshigongi sha IPM shonuumvo osha thanekwa okukalako okuza omasiku 13-14 ga Kotoba poHotel Safari muumbugantu wOshilandopangelo. Konima yoshigongi otapa ka kala iitelekela  mpoka tapa ka pandulwa mboka ya longa nawa noonzo dhopantu.Iitendele mbika otayi ka ningilwa poHotel Hilton tayi adhika pomutima gwoshilando.

Omuperesidende gwa IPM ye okuli omukokoli gwehangano ndika Ekandjo okwa ti oshigongi shonuumvo osha dhenga mbanda oshoka otashi ka kalwa kaanawino moonzo dhopantu yaza moshitopolwa shUumbugantu wenenevi ndika, okupopya nokukundathana kombinga yiipambele yewiliko lyaaniilonga momahangano momahupilo goshilongo.

Oministeli Onkuluntu ,Hage Geingob, oye ta kala omuyenda a simana poshigongi shika na okwa tegelelwa eke shi egulule pambelewa mo 13 ga Kotoba nuumvo.

“Otuuvite enyanyu  kekalepo lyOminista Onkuluntu moshigongi shetu oshoka ombelewa ye oyo omugameni gwewiliko lyoonzo dhopantu mepangelo , ndyoka olyo omugandji gwiilonga omunene moshilongo shomapenda,” Ekandjo a ti.

Aapopi yalwe mboka ya tegelelwa omwa kwatelwa, Donna  Rachelson, ngoka oye omutotipo gwehangano li na sha noku tseyitha noku tumbaleka iilandithomwa momahupilo. Rachelson omunawino momalanditho nomatseyitho nokwa longela omahangano ngoka taga enditha nawa oongeshefa dhago ngaashi Nandos, AECI nOmbaanga yoStandard.

Oye wo omutotipo gwehangano  lyokudhinapaleka nokutseyitha iilongomwa lyedhina YOU. Ndika oha li longo, hali ningi iigongiilonga noshowo ohali gandja omayele kombinga yokutseyitha iilongomwa nuukeka, ohali ulikile wo mboka opo taya tameke okutseyitha iilongomwa yawo nawa nkene ye na okushininga oshowo ohali gandja omayakulo kwathelo kaalandithi naahambuli yiilongomwa.

Rachelson oye wo omushangi gwembo li holike lyedhina BRANDING and Marketing YOU, embo lyotango moSouth Africa mokudhinapaleka oshowo mokutseyitha iilongomwa niihambulwanima.

Yalwe yomaapopi omwa kwatelwa Sebby  Kankondi,Omunambelewa omukuluntupitithi gwehangano  Bidvest  Namibia, taka popya kombinga yaashoka aawiliki yopombanda momahangano ya tegelela okuza kiitopolwa yoonzo dhopantu.

Kankondi  Omunambelewa pitithi eshiwike nawa na okuna uuyamba nontseyo onene  no ya mbwalangandja ndjoka a mono moku kala mewiliko lyomahangano ngaashi, Nampost, Namibia Ports Authority, oshowo nee Bidvest Namibia moka omo eli ta wilike sigo onena.

Kankondi omunawino nenge onginia yiikwamashina nokuna wo onkatu yuulongelwe mewiliko lyoongeshefa.

LEAVE A REPLY

Please enter your comment!
Please enter your name here