Oshipa shilaula Oshiwa

0
271

Omukalo oo uli momwoode paife wovanhu tava kelema inau nyika ashike pange apa, ashite owa nyika yoo oshiponga koukolele womunhu.

Eedula edi ovakainhu vahapu novalumenhu vamwe ovena po omukalo wokukelema hano okuyeleka nokushitulula oshipa pamukalo uheshi wopaushitwe.

Omafiku enya Kundana okwa didilika nghene omukainhu umwe a kwatwa keenyala komunailonga womombaanga omhanga a li ta vatelwa pokakende komombaanga.

Meme ou okwa pula a pewe oshimaliwa kokambo kaye kombaanga, naashi ngeno eke shi kufa po eshi tula mokandjato, omuyakuli womombaanga oo a li kombinga ikwao yokakende okwe mukwata keenyala ta ti “oshimaliwa eshi kashishi shoye”.

Ye meme ta nyamukula ta ti “ahawe osha nge”. Kundana okwa dimbulula nghene oshipala shomuyakuli sha lunduluka nonghumwe mokudimbulula kutya omukainhu ou okuna oshipala shitilyana pyuku-pyuku omanga eenyala daye dilaula. Vamwe tava ti meme ou ota monika afa okakende koshinamunate shoFanta katulwa pamwe naako koCoke.

Oshinima eshi nande osha kala nale hashi ningwa, eedula edi osha hanya unene, navahapu nokuli paife ova konga omikalo dimwe dipe dokukelema.

Kakele kokulivaveka omaadi oo okuyeleka, vamwe nokuli paife ohava nu eepela voo tava vendelwa omiti dokuyeleka.

Epulo olo eli kutya, ngee nee hatu landeni omaadi okukelema pomatala nopeenhele dimwe, ohatu lesheni ngaho? Ohatu taleni ngaho kutya amwe omomaadi oo, omiti dokuhakula omaudu oshipa eli li nakuli li?

Oshi shivike nawa kutya nge to longifa omuti wonhumba sha pitilila, otashi ku etele opo olutu loye li kolonde, no ita li ka tambula ko vali okuhakulwa nomuti wonhumba.

Sha hala kutya ngee owa kala toli ndubile omiti odo nelalakano lokukelema, opena efiku limwe toka vela, ndele nande oupewe omiti kundohotola ito veluka shaashi olutu loye owe li kolondeka. 

Omafiku aa Ndohotola Hamata okwe shi yeleka kutya, kapena oshipa shiwa shidulife oshipa shetu shovalaule.

Naavo nee hatu kala twa hala okufa, nano oilumbu ile ovatakumi oveya po nomupopyo ta u ti “black is beautiful”.

Hano oshipa shovalaule osha shitwa nawa. Oshina oluvala olo lina ovakwaita volutu vakola mokulwifa okaankera yoshipa oyo hai etifwa keenhe detango. Hano oshipa shetu inashi fa shoilumbu osho hashi pi diva komutenya, nohashi kwatwa kokaankera.

Ove vali nande oulikeleme shifike peni, kuna nokaninge oshilumbu.

Ovanhu aveshe oveku shi kutya ove omulaule, naave mwene yoo oulishi kutya omulaule. Nande ngoo oulikeleme, toli tula eexwiki da twa pombuda, ove to kala nee topopi omalaka ovakwailongo, vamwe nokuli ohava i keendohotola opo va tulwe omayulu a honga -kutya ouninga ngahelipi, ove omulaule, na kuna efiku u ninge oshilumbu. Natu tambule ni ko eshito letu liwa.

Pa ku lishitulula ngaha otwa fa twa hala oku ulikila ava ve na oshipa shitoka kutya vo oveli xwepo vetu dule, nomolwaashi hatu li shitulula ngaha tuva fe.

Otwa fa hatu ulike kutya fye ina tu manguluka notu li natango moukoloni, novanhu voipa itoka otava kala ovapangeli vetu, nomolwaasho twa hala okukala tweva fa.

Okulikelama, okwa fa taku ulike kutya omunhu ino panda naana eshi wa pewa oluvala loye li laula kuKalunga. Owa fa uwete oilumbi iwa, ya lungama, ina eendunge i dule ovalaule, nomolwaasho to kelema ngaha.

Onghee hano natu tambule ko oipa yetu. Oiwa, ihai kulupa diva, yoo iha i kwatwakwatwa komikifi noupu. 

LEAVE A REPLY

Please enter your comment!
Please enter your name here