Va dimbuluka omapenda molwiimbo lopamhepo

0
411

ONGWEDIVA – Ovaunganeki vOmulunga no J&P Concert, hano oxungi yeendjimbo dopamhepo hai kala mOngwediva omudo keshe, neudo ova dimbuluka ovaimbi vakulu vomaimbilo opamhepo eshi veva pa omapapa noimaliwa.

Mwaavo va pewa omapapa pefimbo loshiindingili osho shali mendiki laNghifikepunye Pohamba moUnam, omwa kwatelwa meekulu Helena Shuuladu oo a xulifa mo 2012. Meekulu Shuuladu oye a imba omaimbilo mwa kwatelwa atatu eli mEhangano, ngaashi olo la shivika nawa Tate Kalunga tala oshiwana shetu, Omudo mukulu wa xula po, na Hatu kwiindile Omwene. Nakufya Peter Gabriel a shivika nawa nedina Pedrito naye okwa pewa yo epapa. Omapapa oonakufya ava vavali okwa tambulwa ko kovakwapata vavo.

Oomeekulu Magdalena Kambudu, Aino Dumeni, Lavinia Nakashole nOmuwambo GwaAmbambi Peter Landuleni Shivute navo yoo ova pewa omapapa.

Oufiku aushe wOlomakaya fiyo ongula yOsoondaxa, eengudu domalwiimbo novaimbi veendjimbo dopamhepo, ova hafifa ovapwilikini omafele ovo vali veya koshiindingili, nokupwilikina eshi ova imbi ava tava fiyafana po.

Omuunganeki woshiindingili eshi Wilhelmine Mumbala oo eli mewiliko lOmulunga Radio okwa ti eengudu di dulife po 90 oda li de li shangifa opo di kufe ombinga mefiyafano eli.

Ovanhu ile eengudu domalwiimbo dili hamano oda findana omapapa noimaliwa.

Martin Uukunde oye a findana mongudu yovashikingalo, na okwa hoololwa yoo omwiimbi kamana edule aveshe ovo va kufa ombinga oufiku oo. Okwa pewa ekopi, noshimaliwa keemuma.

Ongudu yoolwiimbo Longela Omwene oyo omufindani wotete meengudu dolwiimbo ya pewa oshimaliwa shifike po N$5 000, ekopi nodjapo. Omufindani omutivali okwa pewa oN$3 000, nodjapo omhanga waxuuninwa a pewa N$2000 nodjapo.

Ongudu onhivali oyo yo yovanhu koohandimwe omo omwiimbi wotete hano okaana kokakadona keedula 10 Kesia Iyambo oko keya kotete nokafindana N$900. Omufindani omutivali okwa mona N$600. Shaashi inapa monika omufindani omutitatu mongudu, omufindani wotete okwa pewa opo a tokole kutya oshimaliwa osho eshi yandje omaano kwaavo vewetike vena omhumbwe hano ocharity.

“Elalakano loshiindingili eshi, okueta ovaholi veendjimbo pamwe, okuhanganifa ovaimbi, okuxwaxwameka ohole yeendjimbo dopamhepo moshiwana shetu nokulongela Kalunga. Elalakano likwao olo okudimbulula oilonga yalongwa kovaimbi vetu omanga vahapu vomuvo ve na omwenyo, vo va honge nokuhokifa yoo ovaimbi vape eendjimbo,” Mumbala ta ti.

Omwiimbi Pele Mwatunga oo a li a pulwa a yandje epapa kumeme Ndapewa Toolu nofamili ya meekulu Helena Shuuladu  Meekulu Aino Dumeni naye yoo okwa pewa epapa kuVincent Kamulunga wokOmulunga Radio ta yandje epapa kumeekulu Magdalena Kambudu Omuwambo gwaAmbambi naye okwa pewa epapa

LEAVE A REPLY

Please enter your comment!
Please enter your name here