Elelo lyUukwanyama olya ti euliko lyomalenga olili pa kotampango.

0
332

EENHANA – Aakalimo yomoshitopolwa Ohakafiya mboka oshiwike sha yi ya li ya holola omadhiladhilo ga tsa ondumbo neuliko lyomalenga gaali okuwilika oshitopolwa shoka, oya li ishewe ya sithwa ohoni sho osheendo sha tumwa kOmukwaniilwa kohi yOmunashipundi shElelo lyUukwanyama , Omusamane George Nelulu eya lombwele kutya Omalenga ngoka gaali oga ulikwa pakotampango  lyUukwanyama.

Nelulu okwa lombwele aakwashigwana mboka a ti euliko lya Ephraim Weyulu na Toivo Shiiweda olya ningwa pakotampango lyElelo lyUukwanyama oshowo pamulandu.

Oshigongi shoka sha ningilwa poombelewa dhoshikandjohogololo Omundaungilo oshali nelalakano okutseyithila mboka inaa ya panda  euliko lyomalenga ngoka gaali kutya, mbaka oya li ya ulikwa kOmukwaniilwa Martha Kristian Nelumbu pakotampango noshowo kutya opena omauliko galwe taga ka ningwa ngaashi mboka taya pula.

“Ngaashi mu shishi kutya Elelo lyUukwanyama ohali longitha ekotampango lyalyo ndyoka wo lya yalulwa kepangelo lya Namibia, onkene euliko lyomalenga gaali omanene olya li lya ningwa okupitila moonkundathana naakalimo yomomukunda ngoka oshowo pautho lyekotampango,” osho Elenga enene George Nelulu a tseyithile aakwashigongi.

Okwa lombwele oshigongi kutya aakalimo yomomikunda ndhika otaya longithwa komalenga ngoka ga li ga tidhwa muulenga, goo George okukwatha  aanamukunda oku tidha po oluhepo momikunda dhawo.

“Mbaka otaye mu longitha nokumu heka  opo mu tsondumbo nElelo lyUukwanyama esimanekwa, omolwa ehangano ndyoka lya dhikwapo oku kwatha aanona ye li moluhepo,  naakiintu mwa kwatelwa mboka ya gumwa kombuto yoHIV/AIDS. Kaleni mu shishi kutya mbaka ka ye na esiku na  ye mu kwatha onkene ne otamu manapo ashike ethimbo lyeni,” osho eya londodha ngaaka.

Aahololimadhiladhilo mewiliko lyomupopiliko gwawo , Moses Ndiilenga oya zimo moshigongi inaashi hula nokuthigamo ashike mboka ya  gama kEelelo lyUukwanyama taya pulakene nawa moshigongi. Oonakuholola omadhiladhilo mboka ya thigi po oshigongi oya kala pondje taya imbi omanga taya endithwa kopolisi. Mbaka okwa li ya tseyithilwa kOsheendo ShOmukwaniilwa kutya etokolo lyokulangeka omalenga ngaka olyo lya hugunina na ishewe ndika olili pakotampango.

Mbaka ota ya indile opo Elelo lyopahedhi  lyUukwanyama li ninge omahogololo kombinga yeuliko lyomalenga ngoka.

“Uukwaniilwa wetu otawu thiminikile aantu kehe shoka omanga, ewiliko lyetu lyopashitopolwa olya pumbwa oku kundathanwa nalyo omanga inaapa ulikwa omalenga. Otwa pumbwa okuhogolola aawiliki yetu tseyene noshikwawo omukunda gwetu inatu hala gu topolwe miipambu iyali, ngaashi shoka sha ningwa no pwaana aakwashigwana  yomomukunda nguka ya pewa ompito okutya sha kaawiliki mboka ya pewa,”  Moses Ndiilenga a ti.

Omalenga ngaka gaali , Ephraim Weyulu na  Toivo Shiweda oya li yuulikwa ongo omalenga omumvo gwayi pamautho gekotampango lyElelo lyUukwanyama.

Omumvogu mElelo lyUukwanyama omwa li okwaana ombili oshoka anuwa Omukwaniilwa ota wilike nombepo yuukayamukulwa. Yamwe yomAakwanyama oya lundile Omukwanililwa kutya oha kutu nokutidha ngaashi a hala.

Elelo ndika olya taalela oshipotha mompangu konima sho Omukwaniilwa Martha Mwandinomho ya Kristian Nelumbu  a tidha miilonga omalenga omanene gatatu.

Elenga Enene lyoshipundi shaHaingu Urias Ndilula oye a lesha oshipopiwa shomukwaniilwa  Martha Mwandhinomho.

 

 

 

 

LEAVE A REPLY

Please enter your comment!
Please enter your name here