Eluwa, ofikola yowina yovahongwa ve na oulema

0
191

ONGWEDIVA – Eluwa  enongelo lovahongwa  tava nongekwa mehongo leli kalekelwa hava longifa eenyala. Ovo ihava udu ko ohava popi nomadidiliko neenyala, ovo vehe wete ko otava lesha eendada neenyala.  Nomodula tai ya, Eluwa Ii li modoolopa yaNgwediva moshitukulwa shaShana, otali tambula ovahongwa vape. Eshi ya tembukila mOngwediva okudja kEngela 1973 muApiilili,  ofikola yomuhandjo oya tamekele novahongwa 130 ovanaulema vomesho  neembolo, ashike eshi omwaalu woshiwana tau ende tau tane mEluwa paife omu na ovahongwa vomaulema a yooloka ve li 345.

Edi, oda tumbulwa komukulunhufikola  wEluwa,Frans Kandjulu kutya, nande ovahongwa tava ende va finda komesho neengudu, natango omwaalu wovanafikola otau tane. Ngaashi naana omatambulo eefikola dikwao  haa xulu muSepetemba, 30 nomofikola Eluwa etambulo lomudo 2015 ola xulila mefiku  eti 30 Septemba, 2014.

Ofikola ei ohai longo ehongo le li kalekelwa, hai tambula ounona tava tameke oshikunino okudja peedula nhatu fiyo heyali, ashike peemhito de likalekelwa otai dulu okutambula fiyo ounona veedula omuwoi ongovatameki. Ofikola Eluwa ohai tambula yo ounona vomondodo onhihetatu okudja keefikola dehongo laaveshe, ngeenge kwa didilikwa kutya omuhongwa oku na oupyakadi we likalekelwa. Okaana ngeenge oka didilikwa kehe wete ko, nena otaka dulu okutambulwa mongudu yovanaulema vomesho a leshe nande ehongo lowina eli  tali lesha “obraile” otali endele pamwe nomufindahongo weefikola dikwao moshilongo. Ngeenge omuhongwa okwa didilikwa e he udite ko, ota dulu kudjoina ovahongwa hava popi neenyala elaka loshimbolo/ hali longifa omadidiliko.Mokudimbulukwa efiku lokadibo katoka edidiliko lovanaulema vomesho pamufika wopaiwana Kotoba 15, oshiwana otashi tuwa omukumo shi kwatwe kohokwe yokushiiva okulesha obraile, ponhele yokutameka okulihonga eendada doludi eli ngeenge omunhu we lihaluka wa kanifa omesho. Neudo efiku eli otali dimbulukilwa modoolopa yaOutapi moshitukulwa shaMusati. Nomupopi munene mefiku omuprima woshilongo Dr Hage Geingob.

Kandjulu okwa fatulula kutya, ovanaulema vomesho va pita ondodo onhimulongo mEluwa, ohava ka twikila kosekundofikola yopombada yaGabriel Taapopi.Ovo ihava popi ohava ka twikila ondodo onhi-11 kosekundofikola yopombada yaMweshipandeka nayo ili mONgwediva. Nande ovanaulema vomesho mofikola paife ve li lwopo-90 lwaapo, mokati kovafitamatwi ve dule 300, ovanaulema vomesho va pita ondodo onhi-12 otava longo moikandjolonga ya yooloka yepangelo. Nande epangelo la tokola kuxulifwe po ehongo le likalekelwa, ovalihongi hava longifa omadidiliko okeenyala ohava kwata nodjuu  nohava dimbwa diva. Molwa oukwatya wavo, omwaalu wovahongi ve na oulema woludi eli ounini neenghono. Meluwa omu na omuyakulihongi woludi eli umwe, onghee kashipu va fike pondodo yovahongi va nongekeka.

Kandjulu okwa yelifa nghee epangelo li na omafaneko mawa taa yambula po eenghalo dovanaulema vomaludi  aa shihefi ashike mEluwa ndele okwa pula oshiwana shiha holeke vali oilema momaumbo, ndele ve va ete keefikola doludi eli di li hetatu moshilongo.

 

LEAVE A REPLY

Please enter your comment!
Please enter your name here