Gandjeni iikulya yongushu kiinamwenyo yeni

0
186

ONANKALI – Aanafaalama moshitopolwa shaShikoto omasiku ga piti oyali ya indilwa opo ya gandje iikulya yongushu no yina iitungithi kiinamwenyo yawo.

Shino oshali sha longekidhwa kUuministeli wUunamapya, sha  ningilwa pombelewa yUunamapya pOnankali. Omunambelewa mombelewa ndjika Veronika Nghishidimbwa okwa ti oya longekidha esiku ndika owina opo ya gandje uuyelele kaanafaalama kombinga yiikulya yilwe mbyoka taya vulu okugandja kiimuna yawo pethimbo ndika lyokwenye.

“Pethimbo ndika iimuna oyindji ohayi kanitha uukolele noyindji ohayi si unene oshoka ohayi kala yili mompumbwe yiikulya nuunapelo ohawu kala wa pumba, otwa koneke aanafaalama oyendji i ha ya sile iimuna yawo oshimpwiyu unene pethimbo ndika yimwe nokuli ohayi kala yeethelwa momalundu nonande kamuna omwiidhi,” Nghishidimbwa tati ngaaka.

Nghishidimbwa okwa indile aaniimuna ya gandje iikulya yongushu noyina iitungithi kiimuna yawo opo ya yande ekanitho lyiimuna tashi pitile mondjala. Konyala aanafaalama yaza koombinga adhihe dhoshitopolwa shaShikoto oya li ya holoka yo ya pewe uunongo kutya iikulya yini taya vulu ku gwedhelapo iimuna yawo, yo yi vule okuhupa

Aanambelewa yalwe yuuuministeli mbuka oyali ya ulikile aanafaalama mboka yali ya gongala nkene omuntu ta vulu oku longa iikulya yina iitungithi no tayi vulu yi liwe kiimuna.

“ Yimwe yomiikulya mbyoka tayi vulu okuliwa ongaashi, omunafaalama ota vulu okufula oshilambo mono ta tulamo omwiidhi,iihenguti ya kukuta, omeya nuuhoho hawu ithanwa (urea), ayihe mbino otayi tulwa mumwe moshilambo moka ashike manga inaa yi tulwamo pevi opuna oku kala pwa yalwa oplastika etaku siikilwa nawa opo moshilambo kaa mu ye ombepo, ko kombanda taku siikilwa nawa,” Nuuyoma tati ngaaka.

Nuuyoma okwa gwedhapo kutya oshilambo ohashi ka patululwa konima yomasiku omilongo mbali nalimwe (21), naangawo omunafaalama okwa manguluka okupa iimuna ye yilye mo yo mone uukolele.  Aanambelewa mbaka oyeende omahala nomahala taya ulukile aanafaalma nkene yena okupalutha iimuna yawo pethimbo lyokwenye.

Gumwe gomaanafaalama mboka yali ya holoka esiku ndyoka Mateus Amukambo okwa ti, momaulikilo ngaka ga nkene omuntu to vulu okulongekidhila iimuna yoye iikulya yilwepo yo yi vule okuhupa ,okwa likolamo oshindji oshoka koombinga dhawo ka kuna omwiidhi gwiimuna noyindji oyasa nokuli. Okwa pandula uuministili wUunamapya sho tawu kondjitha noku yapa omadhewo yo ya vule oku hupitha iinamwenyo yawo pokwenye. Tati ngaashingeyi iimuna ye itayi mono we iihuna.

 

 

LEAVE A REPLY

Please enter your comment!
Please enter your name here