Omolwashike to hepeke edjona dihe na etimba

0
210

Oshinima sha holoka moshifo shaKundana oshivike shadja ko shounona va mangwa nomalyenge nomakumba komukunda Okapuku mOndonga, inashi halukifa ashike ovaleshi ashike osha halula yoo oshifo Kundana.

Otashi kumwifa okumona nokuuda omukainhu omunyasha ta pandeke eehanana difike penya ye ashive a kanwe omangadja.

Oshinima eshi otashi nyemateke osheshi omukainhu oo okuna okaana kaye mwene, oko hai nako ngee ta ka shinga yee vavamwaina teva mange nomalyenge, vehe na nande oshikulya ile omeva okunwa. Hano eshishi nawa kutya okupandeka omunhu nomalyenge oshinima shii, onghene kaye mwene ihe ka fiye mo melyenge ile nokuli meumbo shaashi okushishi kutya osha puka okufiya eehanana difike penya meumbo odo adike.

Oshili nhumba yangadi, nande oukale ngaho una onyanya, oto pandeke okaana nelyenge? Osheshi nee kamukweni? Ndele naashi nee to nu okatombo otaka ende po ashike nawa pomunino? Ito li vele nande ombedi wa fiya ounona vavamwanyoko weva pandeka wafa wa pandeka oumbwa manga koye kekukalela ponho?

Eshi shinyemateka unene elipopilo laye ololo kutya ihava udu ko. Kapena okaana kehefi ka fifiti, shapo ongee ke na ounghundi womadilaadilo. Oufifiti oo oshitukulwa mokukula nokuputuka kwokaana keshe ke he na oukambeli washa.

Ehokololo lameme oo, ota li dimbulukifa Kundana okanamambo kaShalulile, omo omukainhu naana ngaashi ou a li ha hepeke okanona kamumwaina.

Ava nee vokOkapuku kave shi nee oufiye, ngaashi oko ke li membo laShalulile. Omunhu oto kumwa nee kutya eshi ounona ovo tava li tava pi ngaho vena ooxe nooina veli ko vena omwenyo, ngeenge ngeno okwali va fya?

Ovanamibia otwa pumbwa okukala tuna omhepo yohole. Ndele ohole oina okutameke meni meemwenyo detu, ndele hatu i ulikile ovo veli popepi nafye unene tuu ovaneumbo letu, ovashiinda opo nee ovanamukunda vakwetu noshiwana ashishe.

Ngeenge nee omunhu kuna ohole nomuneumbo ile nomutekulwa woye, olyelye toka kala uhole?

Kundana ina hala naana okupangula meme ou shaashi pamwe oku na ngoo okaunghundi konhumba, ile ngaashi ta ti ye okwa wanifa po ashike oveta oyo ya tulwa po komusamane waye.

Vakwe tu ootate! Omahepeko oomeme nounona ota mu a xulifa po naini hano? Onaini ta mu xulifa po okuhepeka ovanhu ovo ita va dulu okuliamena kuvo vene.

Ovalumenhu ova pewa nawa eenghono okuamena ashike eenghono edi ota ve di longifa okuhepeka nokudipaa.

Ashike ngeenge meme ou oshinima eshi okweshi ninga eshi hala nokushi eshi ta ningi, oveta oya pumbwa i mu katukile onghatu.

Tetete, komesho yopolifi, noyepangelo, oomeme ovo ovaameni novakaleki po veemwenyo, omalutu nonghalonawa aishe younona.

Ngeenge oomeme ovo veli neekelelwa eamano nefiloshisho lounona kuKalunga mwene nokovanhu ovo tava hepeke ounona, olye mbela teke va fila oshisho? Olye teke va amena keemhepo domounyuni ou omanga veli mepupi lounona elela?

Ita ku ti ootate inava fila ounona oshisho ile nava pandeke ounona momalyenge, aaye. Ootate navo ove li ovaameni vounona novakainhu, nomolwaasho ovalumenhu vahapu ovo va halulwaa koshinima eshi va pula ngeenge otava dulu opo va pewe po ounona ovo veva tekule.

Ashike ekwatafano lotetetete okaana haka ningi kombada yedu, onomukainhu. Hano oshili oshinima shopashito komukainhu okuhola okaana nande kakeshi kaye shaashi oye heka shiiva tete, manga ina keya ko nokuli kombada yedu.

Ngee oifitukuti noinamwenyo yomomaumbo oha i amene ounimwena vayo ngaashi naana tashi dulika, mbela mwene weshito okwa teelela ovanhu vakale ngahelipi nounona?

 

 

 

LEAVE A REPLY

Please enter your comment!
Please enter your name here