Omutekulu waNakambale a talela po Namibia konima yeedula 200

0
179

ONGWEDIVA – Opa pita paife omido 200 eshi osheendo shomutumwa  wotete omuNdowishi  Heinrich  Schmelen a dika etumo moshitukulwa sho moumbangalanhu wa Kaapa moSouth Africa omudo 1814.

Mokudimbulukwa eenghatu domutumwa Schmelen, umwe wovatumwa  va dja pondje yenenedu Africa va hombola ovaAfrica. Osheendo shovaSuomi  ve li omuwoi, va dja koFinland ove ile ketyapulodimbuluko lonakudiwa ei poKomagas moSouth Africa. Osha kwatela mo ehombolo lomutumwa  nediko letumo poBethanie moNamibia  konima yeedula 200.

Edi, oda kolekwa kodalele yovatumwa moNamibia Olle Erickson, omukwateli komesho wosheendo shovaFinland va talela po Namibia, va tamekela koSouth Africa.  Erickson okwa ndjokonona epata loomutumwa Schmelen omo mwa dja omutumwa wotete e ya moWindhoek noRehoboth. Mepata omo tuu omo omwa dja oshilyo sha dika po etumo mOtjimbingue 1869, nokOmandongo moshitukulwa shaNdonga. Okudja muSeptemba 14 fiyo Oktoba 6, 2014 ova landula ondjokonona yaZara Schmelen omuAfrica wotete a hombolwa komutumwa omuNdowishi, va tamekela koKomaggas shaSouth Africa va  pita moBethanie, Windhoek, Otjimbingwe, Omandongo tava xulile mOlukonda.Vahapu va ile koshivilo koKomaggas, ovapambele va dja moNamibia, koGermany, koFinland,  koNorthern Polar nomoSouth Africa.

Mosheendo omu omwa kwatelwa omutekulu omutine waMartin Rautanen  wedina Anu Rautanen, osha xulila peembila dovatumwa mOlukonda moshitukulwa shaShikoto omo mwa pakwa Rautanen.

Erickson ta we da pot a ti, nande ongerki paife ya fikama kuyo vene, oya dja poudjuu, poluhepo no melididimiko novaFinland vahapu natango onghee ve na odjuulufi okumona Namibia, okutalela po eenhele da yooloka nokumona omutungilo woshilongo omo mwa longa ooxekulu nooinakulu nokutala opo va nangala. Mokati kovatumwa va longa moNamibia, vavali ashike va dile koSuomi va kala moNamibia oule womido di dule po50. Martin Rautanen ou a kala mo eedula 56 mangha ina fya naUlla Nenonen e ya netumo moNamibia 1961, eshi a pendjelwa oule womido 20 okwa kwafela metoloko lEtestammendi lipe melaka lolUdhimba la tameka okulongifwa 2014.

Metungo tali longifwa natango konima yeedula 100 pOniipa ,ovakalimo pefimbo loita,ova piyaanekwa keembulu tava pulwa eendjebo noikulo. Erickson ta yandje oshihopaenenwa shexwiko loshinyanyangido 1976, nomutumwa Terttu Heikinen a lyata oboma netuwa.  Omukwetu wokoSuomi hau ifanwa  “Kotima” noLutheran World Federation ova ongela oshimaliwa shetungululo diva loshinyanyangido nande petameko leedula domi 1980 sha bomululwa vali ndee natango osha tungululwa. Eli efindano linene kovatumwa.

Erickson ta holola ta ti, pefimbo loita younyuni ekwatafano pokati kovatumwa moshilongo noFinland ola li  la teka po. Naashi omaudjuu a kandulwa po oshilonga osha twikila.  Ova longa moukumwe noshiwana nopomafimbo madjuu nelalakano, okulonga nokuyandja ongereki koshiwana shi i wilike shoovene. Omakwatafano fiyo onena opo e li,ongerki koFinland nomoNamibia .

Mokumona apa pa pita ooxekulu nomatemba, va kokola evaengeli noudjuu, exumokomesho loshilongo omo paife mu na ashike omukalelipo umwe. Erickson  okwa  kumaida oshiwana shi diinine omalaka ovadalelwa mo , unene ovanyasha va kanifa  omikalo dopashiwana, nova dina oukriste. Ta tu omukumo ovakriste va diinine eitavelo. Ta yandje oshihopaenenwa shovanyasha koSuomi, ve li kokule neengerki, ta  ti, ongerki i yandje etumwalaka tali tu kumwe nefimbo lopaife opo ovanyasha vaha faduke po. Okwa pula yoo oshiwana shi ongele ondjokonona yetumo kovatetekeli manga inava pwa po.

 

LEAVE A REPLY

Please enter your comment!
Please enter your name here