Oshipangelo shepangelo pOmuthiya natango ita shi longo.

0
261

KuHelvy ShaanikaOMUTHIYA – Oshipangelo shepangelo pOmuthiya shoka konyala sha tamekelwe okutungwa  omimvo ntano dha piti, inashi tameka natango iilonga ya sho meudhililo ongo iipangelo iikwawo.

Sigo ompaka iitopolwa mpoka hapa thikile mboka yeehama unene naampoka hapa pangwa aanuuvu mboka haya shuna komagumbo esiku kehe oyo ayike tayi longo moshipangelo moka.

Otwa kundanekwa konzo yi shi oku inekelwa kutya iitopolwa yilwe mwa kwatelwa omikunda dhina oombete adhihe kumwe 64 ihadhi longo natango, oshoka anuwa ndhika ka dhili pomuthika gwoNamibia Standard Institute (NSI). NSI olutu lwopashigwana lwa dhikwapo koveta yomithika nenge Standards Act (Oveta onti-18 yomumvo 2005) nelalakano okukwashilipaleka kutya ongushu yiilongomwa, niinima iipe tai yambulwa po moshilongo oyi li pamuthika.

Omolwa iilonga inaa yi longwa nawa ya longwa kehangano lyaChina lyedhina, China Jiangsu International Namibia, oshipangelo shika ka kwali sha vula okugandjwa kepangelo omumvo 2012 ngaashi kwa li sha tegelelwa shi ningwe.

Konima yomimvo ndatu oshipangelo shika sha li sha tungwa opo shi kuthe po omutenge gumwe kwaashoka sha Nandjokwe, ihe sigo oompaka shika ina shi vula okuningwa oshoka oshipangelo shaMuthiya natango ita shi vulu okulongithwa.

Oshipangelo shika sha tungwa ongo omagano okuza kepangelo lyaChina oshina ongushu yoomiliona N$70. Ihe ngashingeyo epangelo lyaNamibia olina okulongitha oomiliona N$6, okuopaleka oshipangelo shika nonando iha shi longithwa natango.

Okwa tegelelwa aatungi yoshipangelo shika opamwe nooinginia taya ka tsakanena poshipangelo okutala kutya iilonga yoku opaleka omapuko ngoka gali po oya pwa na oya longwa nawa.

Pahapu dhomuwiliki gUundjolowele moshitopolwa Oshikoto, Petrus Kefas Angala, ngele ooinginia odha zimine omalundululo ngoka ga ningwa koshipangelo , egandjo lyoshipangelo shika okuza koo na ku shitunga otali ka tokolwa kutya otali ningwa uunake.

“Ehangano lyooinginia otali ka tsakanena noonakutunga oshipangelo shika oshiwike tuuka momasiku 22 Kotoba, otandi ke ku tseyithila  ngele esiku lyoku gandja oshipangelo shika olya uvathanwa,’Dhengela ndje mo 22 ga Kotoba opo ndi ku lombwele shoka sha tokolwapo,’ osho Angala a uvaneke.

Angala okwa ti aaniilonga yUuministeli we mwa kwatelwa naamboka yoshipangelo shika oya tegelelwa okutembukila kOmuthiya meni lyiiwike iyali.

Pethimbo ndika Ewiliko lyUukalinawa lyoshitopolwa shaShikoto oha li longele metungo tali hehelwa lili mOshomeya pahapu dhAngala.

Etungo epe lyUuministeli mbuka oshowo omagumbo gaapangi no gaaniilonga yalwe oga manithwa nale na otaga vulu okulongithwa.

Oshipangelo shopadistrika shopOmuthiya osha kala miikundaneki molwomatompelo ga puka uule womimvo mbali dha piti.Pompito yimwe oshifo shimwe shesiku osha tile Minista  gUukalinawa Richard Kamwi naMinista gwIilonga nIiyenditho Erkki Nghimtina oya taambekathanene omalaka ga honga kombinga yiilonga inaa yi longwa nawa  kaatungi yokoChina.

Mokati kiinima mbyoka, Kamwi a li inaa nyanyukilwa anuwa omutungilo gwokila yaasi, ngoka a ti ka gwa li tagu tsu kumwe nethaneko lyetungo. Mombapila ndjoka a li a shangele ku Nghimtina, Kamwi okwa li anuwa a pula ngele  oonakutunga oya li ya hala oku etapo ehala lya shewelwa oomwe. Shika okwe shi popi uulike omutungilo gwominino dhoku ekelahi omeya nkene dha tulwa mevi.

 

 

LEAVE A REPLY

Please enter your comment!
Please enter your name here