Ospana yaNamibia oyi na okulonda ondundu okuya kedhingoloko lya landulako

0
299

WINDHOEK – Namibia moka omo tamu dhanenwa uudhano womanyakwa wOomeme woCAF okuna okulonda ondundu onde ngele okwa hala okutaagulukila kedhingoloko lya landulako muudhano mbuka wuli metifa moVenduka oshiwike shika.

 

Namibia okwa yi meshongo ndika enene sha landula sho a dhengwa muudhano we uutiyali methigathano ndika kospana ya Cote di Ivoire nookoola 3-1 pokapale kaSam Nujoma ongulohi yEtiyali oshiwike shika.

 

Aadhani ya Namibia mboka ya li ya zala iikutu iitokele pethimbo lyuudhano mboka oya li ya tameke  nawa, sho aadhana omanyakwa ngaashi Memory Ngonda oye a li teshi enditha nawa mokati kokapale .

 

Omudheuli gwoBrave Gladiators, Jacqui Shipanga okwa ka etapo elundululo maadhani mboka ya li ya dhana muudhano wotango sho Namibia a dhenge Zambia nookoola 2-1.Melundululo ndika Shipanga okwa  kuthamo Rita Williams  emu pingenepo na Stacy Naris omudhani gwokonima ndele okuna wo aluhe egamo lyokuya komeho nelalakano oku ka tulamo okoola ngele otashi nyengathana.

 

Aadhani ya Ivory oya tameke oku homona ombinga ya Namibia ndele omahomono ngaka oga keelelwa nuupu kaadhani yokonima unene mewiliko lyakapitia gwospana ndjika ngoka a li ta ulike uudhano uuwanawa. Kapitiya gwoBrave Gladiators oye, Uerii Kasaona.

 

Mominute hetatu petameko omudhani gwokonima gwa Namibia, Lina Katuta,okwa yono ompango yomuhikihiya sho a nyenyeta kombinga yoku dhanena omudhani omuIvory nayi. Omolwa udhano waali nawa mboka aadhani ya Ivory oya pewa ompito okuthanga etanga tali ukulile kokoola.

 

Konima yoshiningwanima shika omudhani gwospana ya Ivory Coast Nahi Jones okwa mweneke ongundu ya yambidhidhi ya Namibia sho a thangelemo etanga ishewe lyostrafa ndika ina li ka kwatwa nawa komukwati gwomokoola naandika olya shunwamo ishewe mbala. Osho ngeyi ospana ya Namibia oya kala konima nokoola yimwe mo nola.

Okoola oya yi oshoka omukwati gwa Namibia ngoka omwiinekelwa, Lydia Eixas okwa nyengwa oku kwatapo etanga nomake noku kala nalyo.Kombinga ya Ivory Coast aaNamibia nayo oya ponokele okoola ndjoka nokonyala Kasaona a tulemo okoola  oshoka ashike etanga inaali ukilila nawa mokoola.

Nando ongaaka enyanyu lyaa talelipo olya li efupi oshoka omudhani enyakwa, Rita Williams okwa thanga konyala oshinano okuza pokati kokapale naandika olya piti koondungu  dhominwe dhomukwati gwa Ivory Coast noku ya mokoola . Oospana ndhika nodha kala dhi thike pamwe mookoola 1-1. Okutulamo okoola hoka kwa Namibia okwa li kwa nyanyudha aayambidhidhi oyendji ya Namibia.

 

Omanga uudhano inaa wu ya pokafudho Shipanga okwa kuthamo Elmarie Fredericks noku tuminamo, Twelikondjela Amukoto. Omukwati gwomokoola Eixas okwa hupitha Namibia sho a kwatamo etango ndyoka lya li  lya thangwa lye mu ukilila ku Koko N’Guessan.

 

Oospana adhihe mbali odha kala tadhi dhana noku mona oompito tashi vulika andola okutulamo okoola ndele oompito ndhoka inadhi longithwa oshoka omathimbo gamwe aadhani oya ningi omatokolo ga puka nenge ngoka inaa ga opala. Aadhani ya Ivory Coast oya tameke taya ponokele ombinga ya Namibia, naashika osha dhigupaleke onkalo yaadhani aagameni yospana yaNamibia.

 

Uudhano sho wu uka  lwopehulilo ospana ya Ivory Coast oya mono kutya otayi vulu okusindana na oya tsikile okuhomona ombinga ya Namibia, ehomono ndika olya li lya kwatelwa komeho ku, N’Guessen. Omudheuli gwa Namibia okwa kuthamo omudhani gwa hugunina nokutulamo Williams  a pingenepo Julian Kruger ngoka a li ta ulike a loloka.

 

Omanga oyendji ya li taya galikana kutya uudhano mbuka nawu hulile moospana ndhika dha dhana shithike pamwe omudhani gwa Ivory Coast, Tia N’Rehy okwa ehameke omitima dhaNamibia sho a thangelemo etanga okuza popepi sha landula sho aadhani yokonima ya Namibia ya ndopa okuthangapo etanga ndyoka ye li thangele kokule.

 

Konima yethimbo ishewe omudhani oye tuu nguka okwa tuminwa etanga oku za mokati kokapale nokwe li dhenge nomutse nongeyi okwa tulamo okoola ontitatu ya Ivory Coast.

Uudhano owa thiki pehulilo Namibia a dhengwa ookoola 3-1.

 

Muudhano uukwawo mongundu ndjika, Nigeria okwa pita nale okuya kedhingoloka lya landulako sho a dhenge ospana ya Zambia ookoola 6-0. Ospana ndjoka hayi ithanwa Super Falcons oya tulamo ookoola 10 momaudhno gatatu na oya tulwa ashike sigo oompaka ookoola mbali adhike.Nigeria oye eli pombanda yomusholondondo gwoospana dhomongundu yaA ena iitsa ihamano a landulwa ku Ivory Coast oshowo Namibia kehe gumwe ena iitsa itatu omanga Zambia oye a fulubeka keena nando oshitsa shimwe.

 

LEAVE A REPLY

Please enter your comment!
Please enter your name here