Ya pewa omadheulo muunangeshefa

0
221

 

ONIIPA –Aagundjuka moshitopolwa shaShikoto otaya kondjitha okuyambulapo oonkalamwenyo dhawo. Shino oyeshi holola sho yamwepo yomaagundjuka yaza kiikandhjohogololo ya yoolokathana mOshikoto ya li momadheulo pOniipa oshiwike sha piti.

 

Omadheulo ngano ogali ga unganekwa ko National Youth Council nendiki lyuungomba tali ithanwa Community Skills Development Centre (COSDEF) mOshomeya. Ngono ali ta gandja omadheulo ngaka Jackie Sanjath okwa li a ulukile aagundjuka mbaka nkene yena oku totapo oompito dhiilonga ku yo yene nonkene yena oku ka gandja omadheulo kaagundjuka mboka inaaya vula ku thika komadheulo ngaka.

 

Omukwatakanithi gwaagundjuka mOshikoto Hofni Hamunyela okwati oyali ya longekidha omasiku geli gaali owina opo ya gandje omadheulo kaagundjuka mboka ya dheulwa opo wo ya ka gandje omadheulo kaagundjuka yokiikandjohogololo hoka yazi.

 

Hamunyela okwati enenedhiladhilo lyawo okudheula noku gandja uunongo kaagundjuka opo ya kale aanangeshefa aawanawa mbono taya etamo sha mehumokumeho lyoshilongo. Yo ya vule oku yambulapo Namibia paliko. Ta ti omadheulo ngaka oga tamekele mu Juni omvula ndjika, no yena elalakano ya kale ya gandja omadheulo kaagundjuka oyendji ngaashi tashi vulika.

 

Konyala iikandjohogololo ayihe oyali ya tuma aakalelipo yawo opo ya pewe uunongo nonkene yena ku gandja omadheulo gatya ngaaka. “ Omukulu gonale  okwa tile ohaka yala noluhozi lumwe sho osho nee wu wete tse onga aagundjuka twiimanga kumwe otwa tokola opo twiilongele kutse yene noku yambulapo oonkalamwenyo dhetu oshoka  inatu hala tu kale tuli momalukanda tatu si ondjala noku mona iihuna omanga tatu vulu okwiilongela tse yene,” Hamunyela ta ti.

 

Sanjath okwa gwedhapo kutya oya hala oku kondjitha onkalo yokwaahena iilonga noluhepo mepipi lyaagundjuka, no yena elalakano ya thike puukololo awuhe yo ya vule okugandja uuyelele nkene aagundjuka taya vulu okwiimonene oompito dhiilonga ku yo yene, yo ya kondjithe iimbuluma mbyoka ya londa.

Helena Nashilongo ngono a zile koshikandjohogololo shono opo sha totelwepo Nehale lya Mpingana, okwa ti okwa likolamo oshindji momadheulo ngaka, no kwa uvaneke ta ka gandja omadheulo nuunongo wiihwapo kaagundjuka ooyakwawo yokoshikandjohogololo shawo. Nashilongo ta pandula aalongekidhi opo opolohalama ndjika opo ya mone uunongo mboka ya kala ya pumbwa unene.

 

 

LEAVE A REPLY

Please enter your comment!
Please enter your name here