Esiku lyaanuulema otali ka dhanwa nuumvo mOkatyali

0
207

ONDANGWA – Ngaashi shili omukalondjigilile sho haku dhanwa noku dhimbulukiwa esiku lyaanuulema, nonuumvo esiku ndika otali ka tyapulwa natango.

Omunambelewa mUuministeli wUundjolowele moshitopolwa shaShana Rosalinde Ndiili ndhino okwa li edhi popi sho a tseyitha kutya oya dhiladhila esiku ndika lyanuulema li ka dhimbulukilwe moshikandjohogololo shaKatyali.

Ndiili oya li ya longekidha olweendo lwowina opo ya talelepo dhimwe dhomomikunda dhomOkatyali, yo ya tale woo nkene iilema moshikandjohogololo tayi tekulwa. Ndiili okwa li a holola oku uva nayi kwe oshoka anuwa oya mono kutya iilema oyindji momagumbo ohayi kala ya holekwa naashino oku wete kutya osha puka noonkondo.

“ Tse onga aanambelewa yezulonkalo ohatu ende noku talelapo omikunda nolundji otwa mono kutya aantu mboka taya lumbu nuulema ihaya silwa nande oshimpwiyu nolundji ohaya kala taya ningwa nayi kaakwanezimo lyawo,” Ndiili ta ti ngaa.

Okwa gwedhapo woo kutya aanuulema oyendji otaya ningilwa omahepeko ogendji unene gopalutu nogopamadhiladhilo. “Otwa li twa mono kutya oshikandjohogololo shika osho shimwe shoka shina aantu oyendji taya lumbu nuulema sho osho twa tokola tuye tu dhanene esiku ndika huka tse tu tsakanene naantu yetu,” ta ti ngaaka.

Omunambelewa nguka okwa ti esiku ndika lyaantu taya lumbu nuulema ohali dhimbulukiwa aluhe momasiku gatatu ga Novomba, nonuumvo oya tokola yeli dhimbulukwe noku li tyapula pamuthika goshitopolwa ashihe shaShana.

Okwa indile opo ayehe taya lumbu nuulema ya etwe yo ya dhane esiku lyawo, ta kumagidha  woo mboka taya sile aantu mbaka oshimpwiyu opo ya kale ta ye ya pe iikulya ya gwana, yo ya yande okuya thiga momagumbo oyo ayeke oshoka otaya ka monithwa ashike iihuna. Ta indile woo opo aantu yoludhi nduka kaaya kale we ya holekwa yo na ya kale taya falwa komalongeloKalunga ya ka uve oohapu dha Kalunga noku uva ombepo oshoka oyendji ohaya kala owala ye edhililwa momagumbo.

LEAVE A REPLY

Please enter your comment!
Please enter your name here