Kilimanjaro a yambidhidhwa kuMvula ya Munyango

0
214

OSHAKATI-Okalaba yaadhengingonyo yaKilimanjaro mOshakati oya pewa eyambidhidho lyoshimaliwa komunangeshefa Erastus Mvula Munyango.

Okalaba yaKilimanjaro oyili metifa lyokwiilongekidhila uudhano woongonyo mboka tawu ka kalako momasiku 22 Novemba 2014 pehalandjandja lyoongeshefa yOmundohotola Mvula Munyaango mOshakati. Puudhano mbuka opwa tegelelwa pu ka kondjwe omalugodhi geli 24 ongulohi ndjoka.

Okalaba ndjika oya pewa ekwashilipaleko lyooN$ 15 000, opo yi vule oku longekidha uudhano woongonyo moka kwa tegelelwa aambokisi yokoNooli niitopolwa yopuushiinda ya ka kuthe ombinga.

Omusamane Mvula okwa ti shika okwe shi ningi okuza komutima gwe, okugandja koshigwana shoka osho shi li omuyambidhidhi omunene methikamepo lyoongeshefa dhe.

Okwa ti osha simana okutula iimaliwa momaudhano ngoka olundji haga kaleke aagundjuka  kokule nomapandaanda  oshowo elongitho nayi lyiikolitha niingangamithi.

Okwa ti oshimaliwa okwe shi gandja nelalakano a kune ombepo yuupenda moshigwana shokomongula opo shikale hashi kutha ombinga momaudhano.

Mvula ta tsikileko ta ti oshigwana hashi kutha ombinga momaudhano ohashi kalekepo noku tunga omalutu gasho naashika otashi humitha komeho uundjolowele.

Mvula okwa uvaneke kutya ngele omalanditho ota ga ende nawa otaka tsikila noku yambidhidha omaudhano moshitopolwa.

Joseph Benhard mwene gwoKilimanjaro Boxing Club okwa pandula ewiliko lyoongeshefa dha Mvula sho lya li lya taambako eindilo lyawo noku yambidhidha oKalaba yawo noshimaliwa shi thike mpoka.

Okwa ti shika oshi li etsomukumo enene koKalaba naadhani , na ota hiya  aaNamibia ye ye ya yambidhidhe omalugodhi ngoka ga tengenekwa gethike lwopo 24 ongulohi yo 22 November 2014 mpeyaka poMvula Complex mOshakati.

Kilimanjaro Boxing Club ohayi dhana onkandangala onene moku kutha aagundjuka momapandaanda unene miitopolwa yomuumbangalantu woshilongo.

LEAVE A REPLY

Please enter your comment!
Please enter your name here