Oshipangelo shiinamwenyo sha egululwa pOutapi

0
194

OUTAPI-Ominista yUunamapya , Omeya nOmakuti oya egulula oshipangelo noombelewa oompe dhokugandja omayakulo guunamiti kaanafaalama moshitopolwa Omusati.

John Mutorwa okwa tula miilonga oombelewa oshowo oshipangelo shiinamwenyo shoka sha tungwa niimaliwa ya za koMillenium Challenge Account Namibia (MCA) ndhoka dhili mondoolopa yOutapi moshitopolwa shaMusati.

Ehala ndika lyongushu yoodola oomiliona 16 otali kala noku gandja omayakulo gopaunamiti  kaanafaalama yomoshitopolwa Omusati, mboka yi ihanena niikandjohogololo ya yooloka moshitopolwa shoka.

Oombelewa ndhika dhopashinanena oshowo oshipangelo shika osha thikama miitopolwa yi ili no yi ili ngaashika oondunda mbali dhoondohotola dhiinamwenyo, ongulu yomiti, olabora nenge ondunda yokukonakonena oosampula ndhoka dha zi kiinamwenyo yina omukithi. Opena wo omahala  lyokuthonena, okuningila omakonakono unene uuna oshinamwenyo sha si omolwa uuwehame tawu limbilike nenge oshinamwenyo shi isile, ongulu yiinamwneyo mbyoka ya sa, iigunda yo ku ikalekela iinamwenyo mbyoka tayi ehama.

Poshipangelo mpoka opena wo esiga ndyoka hali longithwa okufikapo iinima ya kuthwa kiinamwenyo mbyoka tayi pangwa nenge iikonakonwa mbyoka ya konakonwa molabora, opo mbika yi ekelwehi pamukalo guli nawa nomudhingoloko, yo mbika yaa taandeleke omikithi okuya kiinamwenyo mbyoka yi na uundjolowele nenge okugandja omikithi ndhoka kaantu.

Mutorwa okwa indile opo aakwashigwana ya longele kumwe naanambelewa yuunamiti wiinamwenyo opo uundjolowele wiinamwenyo wu hwepopekwe nawa moshitopolwa shika.

Okwa londodha aakwashigwana opo ya talelepo oshipangelo okukonga omayakulo ndele inaya tegelela opo aanambelewa yuunamiti wiimuna ya kale oyo taya ende omukunda nomukunda oku konga iinamwenyo mbyoka tayi alukwa andola. Okwa kumike aakwashigwana oyo ya tseyithile ombelewa yuukalinawa wiimuna kombinga yiinamwenyo mbyoka ye wete tayi alukwa.

“Ehala lyomayakulo kehe otali kala ashike tali longo nawa  ngele aantu mboka taye li wilike, longitha, taye li tonatele , oyi itulamo , otaya longo nuudhiginini, otaya longo paithano, na oye na ohole nehala ndyoka shoka ye li talako olyo uuyamba wawo. Moku ninga ngaaka Mutorwa okwa ti opo ashike ondjodhi yokomumvo 2030 tayi vulu okuninga yoshili.

“Osho shili kutya uuna mboka ya pewa oshinakugwanithwa okutonatela ehala ndika, itaa ye shi longo ngaashi ye shi inekelelwa nena omathaneko niilalakanenwa yehala ndika itayi ka tompoka, sho shika itashi idhidhimikilwa,” osho Mutorwa a londodha.

Minista okwa kumagidha oshigwana opo shi iyageke okuguma iinamwenyo nenge okulya onyama yiinamwenyo mbyoka yi isila omanga mbika inaa yi konakonwa kaanambelewa yuunamiti wiinamwenyo.

“Ehala ndika otali ka kwatha okushonopeka oshowo oku kuthapo omikithi dhiinamwenyo ndhoka hadhi taaguluka oongamba, na otali ka kwathela moku hanganitha oshitopolwa shuuniimuna moka aanafaalama ayehe yopaipindi naamboka yomomahala gaayehe taya kala noku mona uuwanawa mokumuna iimuna yawo momahupilo giimuna,’ Mutorwa a ti

Ngoloneya gwaMusati moshipopiwa sha leshwa pehala lye komugandjimayele gwe, Fillipus Kashima okwa indile opo Oshikondo shika shi andjaganeke uupangelo wiinamenyo  mpoka aaanafaalama taya vulu okulanda omiti dhiimuna niinamwenyo yawo koondando dhishi oku idhidhimikilwa.

LEAVE A REPLY

Please enter your comment!
Please enter your name here