Sheehama a langekwa momukunda gwOndonga

0
262

ONDONGA – Elelo lyopamuthigululwakalo lyaNdonga olya li lya ulike Oscar Sheehama oye a ninge mwene gwomukunda Ondonga.  Omukunda nguka oguli ookilometa oonshona okuza mondoolopa yaNdangwa ngele wu uka lwokuuzilo kashona.

Oshituthi shelangeko shika oshali sha ningwa Olyomakaya ga ziko sha ningilwa pegumbo lye mpoka. Poshituthi opwali pwa kalwa kOmukwaniilwa gwoshilongo shaNdonga Tatekulu   Immanuel Kauluma Elifas, omalenga oshowo aanamukunda.

Ngaashi ngaa omikunda hadhi langekwa ooyene naashino osho sha ningilwe pamuthigululwakalo gwAandonga. Sheehama ngono eli omutekulu gOmukwaniilwa Kauluma okwali a ulikwa kElelo ndika opo a ningi mwene gwomukunda Ondonga.

Pethimbo ta pewa omukunda Tatekulu Sheehama okwali a kwathelwa noku tulwa koshipundi ku Amushanga gwelelo lya Ndonga Tatekulu Josef Simaneka Asino, ngono ali a kumike Sheehama a longe nuudhiginini, ye  iitulemo miilonga ye, noku yakula oshigwana nombili.

Oshituthi shino shelangeko oshali sha tsakanene noshituthi shelangeko lyamwene gwomukunda Oshali kuku Hilya Ndilimeke Shilemba naye ngono eli omuna gwAawa nomutekulu gwOmukwaniilwa Kauluma. Tatekulu Sheehama na kuku Shilemba ayehe oyali ya langekwa shithike pamwe esiku tuu ndyoka.

Enyanyu enene olyali lya taka noondigolo yo ootate taya kuwilile oshoka omatenga oga mona ooyene naanamukunda mbaka itaya ilelewe yoyene oya mona aaleli ngaashingeyi. Yamwe yomomikunda ndhika oyali ya nyanyukwa taya holola enyanyu lyawo. Gumwe ta ti ngashingeyi ota vulu oku gandja uupyakadhi nomikundu dhe ku mwene gwomukunda gwe.

Omikunda ndhino pandjokonona nkene dhaza odha kala hadhi lelwa kaana yaawa oshowo kaatekulu ya Tatekulu Kauluma.  Oonakulangekwa momikunda ndhika oyali nayo ya nyanyukwa okutala engathithi lya gongala naasho lya holoka oku ninga oombangi  sho taya langekwa momikunda.

Esiku ndyono okwali kwa ningwa egongelo lyoshimaliwa opo ku yambulwepo nokusimaneka Omukwaniilwa Nangolo dhAmutenya ngono a ka lala nale.Ompampa nenge oshitumbo oshowo ewendo lyOmukwaniilwa Nangolo dhAmutenya otali adhika momukunda gwOndonga lili kohi yomuye ngoka gwa mene mulyo nokukona  omimvo odhindji dha pitipo. Nonande aantu oyendji ina ye shi tseya kutya mOndonga omuna omukunda tagu ithanwa Ondonga ano shino otashiti Ondonga tayi ilele yoyene.

LEAVE A REPLY

Please enter your comment!
Please enter your name here