Aagundjuka na ya kondjele emanguluko lyopamahupilo

0
174

Aanapolitika yoongundu adhihe otaya tsikile okupopya kombinga yemanguluko lyopamahupilo oshowo taya hwahwameke kombinga yiita okukondjitha oluhepo.Shoka tashi nikitha oluhodhi ooshoka kutya etumwalaka ndika olya fala inaali uvika ko kaagundjuka aaNamibia.

Omuntu oto kumwa ngele pamwe mbaka ka ye na omaipulo mbela moshinima shika?Aagundjuka aaNamibia osha pumbiwa oyo ya kale ya kwatela komeho ekondjo lyemanguluko lyopamahupilo. Oya pumbwa okuthikama moongundu oonene noku kondjitha uuthigona mboka tawu indjipala mokati koshigwana.Shika oya pumbwa oku shi ninga nomikalo kehe ndhoka taya vulu okulongitha kutya nee oku dhikapo oongundu miitopolwa okuhwepopeka elongo nenge omuthika gwontseyo miitopolwa nenge miikandjohogololo. Okutopolelathana omadhiladhilo nomathaneko gelongelokumwe muunangeshefa miitopolwa nenge miikandjohogololo. Nenge otaya vulu okukwathela oku ulukila yalwe mboka yaa na uunongo wa gwana nkene taya vulu oku tameka oopoloyeka dhontumba. Omusholondondo gwomathaneko omule no ita gu vulu oku manwako moku gu tumbula. Nando ongaaka mbika oyo iinima mbyoka omuntu iho uvu tayi tumbulwa nenge tu tye tayi popiwa esiku kehe.

Osha li tashi hokitha noku uvitha nawa sho Kundana a uvu okupitila moshimwameme kundaneki New Era kutya omugundjuka gumwe okwa kutha onkatu okugongela oshimaliwa opo shika shi longithwe moku futila aailongi poUnivesiti ya Namibia mboka itaa ya vulu okufutila eilongo lyawo .Omugundjuka nguka okwa kuthako onkalo yaailongi nenge aagundjuka ooyakwawo sho a ende ta konkola pomiyelo dhoombelewa dhomahangano nomagumbo gaanamake okuhehelela mbaka.Mokuninga ngaaka omugundjuka nguka okwe shi pondola okugongela oshimaliwa shooN$12 000 mbyoka a futile mombaanga ya UNAM. Omwaalu otagu dhinitha ngele to gu tala nenge to gu pulakene, na ha olundji to uvu omwaalu ngaa nguka tagu kundanekwa miikundaneki unene tuu uuna gwa gongelwa komuntu gumwe awike, ngoka eshi ningi oshinakugwanithwa she okumona kutya aagundjuka ooyakwawo oya sindana noku adha oondjodhi dhawo monkalamwenyo.

Nguka keshi omwiilongi ndele ye omuniilonga paithano. Omugundjuka nguka keshi andola omuyamba, ishewe keshi omunapolitika ena omutumbo. Oshikwawo moku gongela oshimaliwa shoka ina dhiladhila okupula a futwe okommissi omolwiilonga ye mbyoka.Ishewe ina indila opo a futilwe ethimbo lyokongodhi ye ndjoka a longitha manga a li ta dhengele aantu mboka a li a indile ye mu kwathele iimaliwa.Okwa li ta vulu okudhiladhila ngaaka kutya oye a li a thikama momapandaanda ta hehela nontungwa nenge negala omanga mboka a li ta kongele ekwatho ya lala ongali yaana mbudhi. Shika ine shi ninga molwashoka okuna euveko neitulemo okuhumithakomeho elunduluko lyopamahupilo.

Kundana okwa hala noku halelela kutya ombepo ngaandjika yomugundjuka nguka yi mene noku hwamenena mokati kaagundjuka aaNamibia.Emanguluko lyetu noshowo oku kala twa manguluka itaku ti sha oshowo ita tu ku tyapula ngele aagundjuka itaya, yanga memanguluko lyopamahupilo.

Uudemokoli otawu kala ashike wuna omulyo no tawu ti sha ngele mbuka otawu endele pamwe noompito, dhi thike pamwe moka omuntu ta humu komeho noku ya komeho paumwene oshowo ongo oshigwana. Aagundjuka oye na oshinakugwanithwa okusoshimpwiyu kutya oshitopolwa shomahupilo osha egulukila omugundjuka kehe opo a kuthe ombinga musho.

Ndika kali shi we ethimbo lyoku dhimbulukwa omathimbo sho epandela lyuukoloni lya li lya kululilwa pevi. Aawe tse otwa londeka nale epandela epe lyemanguluko, lyolwala olumbulau netango lyoshingoli, noondjila oontokole, oontiligane, noozizi ndyoka hali inyenge nokupepithwa kombepo kombanda yevi lyOmapenda ongula kehe.Shoka sha kambako osho okuyelutha epandela lyemanguluko lyopamahupilo. Oshoka ndika lyuukoloni wopamahupilo onkee lya londa sigo onena. Emanguluko lyopamahupilo osho oshinakugwanithwa tuna tse aagundjuka oku shi kondjela, tatu shi ningi neitulemo, nomukumo, nehalo, itaa tu sholola okuninga oondjodhi dhetu dhoshili. Natu kalein twi itulamo okuthikitha ekondjo ndika sigo opehulilo kutya nee otashi tu pula shike.

LEAVE A REPLY

Please enter your comment!
Please enter your name here