Ombelewa yUukashikekookantu otayi ka tungwa mbala mOkatyali

0
194

OKATYALI Ehumokomeko sho tali ende lyuuka komeho miikandjohogololo yimwe, oshowo tali pula komeho nomoshikandjohogololo shaKatyali. Shino osha li sha ulikwa sho Uuministeli wUukashikekookantu wa li ya ningi omathaaneko opo mOkatyali mu tungwe ombelewa ndjoka.

Aakwashigwana yomoshikandohogololo shika kumwe naanambelewa yaza mUuministeli mbuka moshitopolwa shaShana oya li ya gongala pOkatyali noku tamekitha iilonga yetungo lyombelewa ndjika.

Omunambelewa mUuministeli wUukashikekookantu Laina Iileka okwa ti oya li ya yi moonkundathana noya thaneke opo ya tunge ombelewa ndjika mOkatyali oshoka oshikandjohogololo shika osha longa nuudhiginini, sho sha ningi ekwatho lyotango noku tunga ombelewa mono hayi yakulile aantu yawo ngaashingeyi.

Iileka tati nenge onshona oya kambadhala okutsakaneka epangelo ondjilakati shi vulithe yamwe mboka yeli koombinga dhimwe ya tega owala epangelo olyo li ete omakwatho kuyo, yo itaa ya kondjo ya tsakaneke epangelo naashoka taya vulupo.

“Otandi pandula kansela gwoshikandjohogololo shika pamwe naantu ye, oshoka otaya longo nuudhiginini moku yambulapo noku humitha komeho oshikandjohogololo shika, ombelewa ndjika otayi ka kwathela omukwashigwana kehe ngoka ta pumbwa ekwatho, no tayi ka longa muuwanawa woshigwana,”Iileka ta ti ngaa,

Okwa thanekwa ombelewa ndjika tayi ka kala yina oombelewa ndatu (3), no tayi ka kala yapwa andola okuya pehulilo lya Maalitsa omvula ta yi ya.

Ehangano ndi lya ulikwa li ka kwatele komeho iilonga mbika olyali lya indilwa opo lyi longe meendelelo yo ombelewa yi pwe mbala yi gandje omayakulo kaakwashigwana.

Kansela gwaKatyali Joseph Mupetami okwa ti oya li yi iyamba opo ya tunge ombelewa yopetameko , yo ya vule oku kala taya yakula mboka ya pumbwa omakwatho moshikondo shuukashikekookantu.

“Otatu pandula Uuministeli mbuka sho wa tokola wu tu tungile ombelewa tse tu vule tu yakule oshigwana shetu twa manguluka,” Mupetami ta gwedhapo ngaaka.

Mupetami okwa indile aakwashigwana ya longele kumwe naatungi yombelewa ndjika, yo ye ya yakule pamukalo omwaanawa, yo, na ye ya simaneke moku longa iilonga mbika ya simana.

KuMaria Namupala

LEAVE A REPLY

Please enter your comment!
Please enter your name here