Yandeni ombepo yuukwamuhoko

0
295

ONYAANYA – Omukwatakanithi gwongundu ompangeli (SWAPO) moshikandjohogololo Onyaanya, Petrus Kambala okwa kumagidha aakalimo yomoshikandjohogololo shika opo ya yande no ya kale kokule nuukwamuhoko oshowo onkalo yuukashikekokantu.

Okwa tsakanene naakalimo yomuAmuteya, konima sho yali ya hiya oshigongi yo ya popithe oshigwana shaamoka.

Kambala okwa li eya kumagidha opo ya yande uukwamuhoko, yo ya kale noku longela kumwe opo ya tunge Namibia.

Kansela gwoshikandjohogololo Onyaanya Henock Kankoshi naye ngono ali a holoka okwa pandula aakwashigwana sho aluhe haya longele kumwe na kansela mokukondjitha iimbuluma oshowo okukondjitha onkalo yoluhepo.

Aanamukunda oyendji oyali ya gongala no yeya ya pulakene shoka tashi inyenge momudhingoloko gwawo.

Oyendji oyali ye na omapulo ogendji konima yoku pewa ompito opo ye eta uudhigu nomikundu dhawo.Ngaashi kwa tiwa ihadhi gwanene omutse gumwe oyendji oyali ya pandula iilonga mbyoka ya longelwa ku kansela gwawo nonande yamwe ye wete kutya oya pumbwa uuwanawa owundji moshikandjohogololo shawo.

Gumwe gwomaakalimo yomomukunda muka okwali a holola kutya oyena ompumbwe yomeya, ta ti nonande yena okapomba keli pomudhingoloko gwawo, okapomba hoka okateka no taya si enota ngaashingeyi. Kansela Kankoshi okwa uvaneke ta ka opaleka mbala uupomba mboka wuli momudhingoloka wa teka.

Kankoshi okwali a kumagidha aanamukunda opo ya kale taya tseyithile mbala ombelewa ye uuna puna sha, shapuka momudhingoloko nenge puna oshinima shimwe kaaye shi uvitile ombili, te ya indile woo ya ye komalongo gomahogololo yo ya tseye nkene eshina ndyoka hali longithwa. Okwe ya tsu omukumo opo ya ka hogolole mu Novomba.

Kambala ngono oye ali omupopi gwesiku okwali a holola enyanyu lye oshoka aakwashigwana oyali ya gongala noku pulakena ku shoka ya etelwapo. Kambala okwa ti shino osho shimwe shomiigongi mbyoka ya longekidhwa moshikandjohogololo shawo ta ti otaya ka kala ya ya komikunda dhilwe noku tseyitha shoka shilipo oshoka oya tegelela omahogololo mu Novomba.

KuMaria Namupala

 

LEAVE A REPLY

Please enter your comment!
Please enter your name here