Aakankolo otaya lili enota

0
193

OKANKOLO – Aakalimo yomoshikandjohogololo Okankolo oya li ya hololele yimwe yomiikundaneki, gamwe gomomashongo ngoka ge ya taalela. Shino oyali yeshi holola momukanda ngoka ya shanga no ye gu ulike kiikundaneki.

Nonande Namibia lya manguluka aakalimo mbaka yomoshikandjohogololo Okankolo oye wete kutya oshilongo osha manguluka owala koombinga dhimwe oshoka opuna yamwe yeli pomagadhi omanga yamwe yeli momikunda taya mono iihuna.

Fillemon Haikongwa omukalimo gwomomukunda Iipanda okwa li a holola okuuva nayi kwe, a ti yo otaya dhengwa unene kenota oshoka ka yena omeya momikunda ndhoka dhili kuuzilo woshikandjohogololo shawo.

Haikongwa okwa ti ohaya nu owala omeya gomomatope ashike olundji omeya ngono anuwa ohaga nuwamo noku lyatagulwapo kiinamwenyo, “otuna woo oomboola ashike odhindji odhina omeya omalulu ngono omuntu itoo vulu okwi idhidhimikila,otwa kala ethimbo ele tatu pula omeya ga yela nonande kansela ohe tu lombwele owala tu kale metegelelo,” ta ti ngaa.

Poompito odhindji ohatu kala momagumbo mwaana omeya oshoka ka tuna mpo tatu ga kutha, kiitopolwa yetu okwa pumbwa omeya noonkondo naantu yetu otaya si enota, uupomba koombinga dhetu ihawu tokiwako nande, otatu mono iihuna noonkondo tatu indile epangelo li tu pe omeya ga yogoka tse tu mone kutya out li moshilongo sha manguluka no tatu mono uuwanawa ngaashi yakwetu yokiitopolwa yilwe,” Haikongwa ta gwedhako nga.

Shilemba sha Kala naye gwomomukunda Uutha okwa gandja omanyenyeto ge ta ti sho ya hogolola ookansela ando oye ya kwathe muudhigu wawo yo ya kwathele mokupendulapo iikandjohogololo yawo.

Kala ta ti omikunda ndhono dhili unene mompumbwe yomeya no tadhi lili enota odho ngaashi Uutha, Iipanda, Ashihaya, Iihundju,Omuhama gwaNashipolo, nOluundje okutumbulapo owala dhimwe.

Ookansela dhimwe mbela odha dhimbwa kutya otwedhi hogololela shike, otatu indile tu pewe omeya mbala ngaashi tuuka pethimbo lyomahogololo, otatu ka hogolola shike ngele ihatu mono uuwanawa moshilongo shetu, otse kehe thimbo tatu mono iihuna nokweenda oondjila oonde tatu kongo omeya/ oshinima shino oshu uvitha ndje nayi noonkondo nondahala epangelo li tu yamukule,” Kala ta ti ngaaka.

Kansela gwoshikandjohogololo Okankolo ina vula oku monika a tye sha ashike omukalelipo gwomukunda Iipanda Hafeni Gabriel okwa uvaneke ta ka tuma yamwe yomomukunda gwe opo ya ka thikithe omakemo gawo kombelewa ya Kansela kOnyuulae ta ti naashino ota kala eshi ninga mbala oshoka aakwashigwana ye otaya si unene enota.

LEAVE A REPLY

Please enter your comment!
Please enter your name here