Ethimbo lyoonkundana oshowo lyiiponokela ya lula

0
281

Oohapu dhiifundja dha South Africa dha nuninwa okulundulula omadhiladhilo gaantu yetu olundji odha li, noshi landuli haa shoka sha li sha tegelelwa ko mu popi gwadho. Iilonga yetu yokutega  noku topitha oomboma meni lyoshilongo oya ulike kutya aakwiita yoPLAN oya li taya adhika konyala mo mahala kokule sigo okuumbugantu woshilongo, moVenduka, moKaiti oshowo mOranjemund. Aakwiita yoPLAN moshitopolwa shomalugodhi oya li ya longekidha iiponokela yawo opo yi tsakanene niiningwanima iinene yopaigwana nenge niiningwanima yopolitika meni lyoshilongo moka tse twa li tuna mo sha.

Pethimbo omuwiliki gwaNdowishi lyokUuninginino, gwongundu hayi tengele kolulyo, Frans Joseph Strauss, a li a talelepo Namibia, tse otwa li wo twa topitha omboma montanda yaakwiita moSuiderhof moVenduka. Etopo ndika olya li lya ningwa momasiku 28 Januali 1988, na olya li lyuuvika konyala moVenduka ayihe, ishewe ndika olya li lya nyolwa miikundaneki yomoshilongo nomwaambyoka yopondje ya sho.

Iiwike itatu ya landulako mu Febuluali South Africa okwa topitha omboma moMbaanga yo First National Bank mOshakati , moka mwa sile aantu 27 nomilongo 70 ya  ehamekwa. Omutopo nguka ogwa li gwa longekidhwa owina opo gu nyateke edhina lyoSWAPO. Oyendji yo maantu mboka ya li ya ya kombaanga esiku ndyoka oya li ya ka futilamo iimaliwa yawo yekwato muumbo wawo noyendji yo mwaambaka oya li aaniilonga yomoshipangelo sha Shakati. Mokati kawo omwa mu na omwanakadhona gwomumbisofi Kleopas Dumeni.

Ongongahangano yOongeleka moNamibia nenge CCN oya li ya pangula oshiningwanima shoka mbalambala ya ti  uumbangi owa ulike kutya omboma ndjoka oya tegwa ku South Africa. Tse oshinima shika otwe shi luku oshitopolwa shopropahanda ya luudha ya South Africa okuluudhika edhina lyoSWAPO.Ngame onda li nda vulu okulombwela osheendo shaatiligane aaNamibia yomongundu hayi ithanwa “Namibian Peace Plan 435” konima kutya oshinima shoka otashi kondjitha omulandu gwoSWAPO ngoka gwa tsa ondumbo noku ponokela iiyodhekwamo iipu”

Na ishewe kutya  “SWAPO okwa tindi kutya okuna mo sha  membomo lyombaanga ya Shakati ndyoka.

Omwedhi gwa landula, kokutya Maalitsa  1988 aakwiita yo PLAN oya ponokele ookamba dhaakwiita ya South Africa pOkatope nEenhana, oshowo oya li ya kondjo molugodhi lwopoKongo naakwiita ya South Africa. Omalugodhi ngaka oga ningwa opamwe naangoka gomoomwedhi gwa Januali na Febuluali, mwa kwatelwa eyahemo lyoondhila mbali dhiita dha South Africa dha ya helwa meni lya Namibia moka aahingi yadho ya li wo ya silemo.

Omalugodhi pOnesi nOkalongo oga fala mekanitho enene lyaakwiita ya South Africa ye li pomwaalu gwaantu 159 moomwedhi ndhoka.Pethimbo ndika iita oya li ya tanaukila South Africa moAngola. Na South Africa okwa li a tokola oku ikuthamo moAngola momasiku 30 ga Auguste 1988. Mesiku ndyoka momeho gaatoolinkundana  omilongo 90 poRundu , mbaka oya thaneke omikweyo omile dhomahauto giita ga South Africa ga humbata omanyolo taga ti: “ Welkom winners – welcome winners”.

Oyendji yaamboka yetu tonde oya li ya pula kutya omolwashike mbaka taya ithanwa aasindani, ngele yo, aasindani omolwashike taya zilemo moAngola noshikwawo omolwashike ya zimine opo okatokolitho oka ti 435 ka tulwe miilonga oshowo omimvo ndatu dhe ikuthomo lyomatanga gaakwiita yaaCuba moAngola?

Oshinakugwanithwa shandje pethimbo lyetata etiyali lyomumvo 1988 osha li oku kondolola nuudhiginini omainyengo gopakwiita pamwe na kommanda gwetu, Hailwa Dimo Hamaambo , Amushanga gwEgameno, Peter Mweshihange. Shika onde shi ningi wo tandi endelele pamwe noonkatu adhihe dha li dha katukwa metulo miilonga lyondungedhiladhilo  yemanguluko lya Namibia pamautho gokatokolitho kOraata yEgameno yIigwana Hangano 435.

Iifundja ya South Africa ya tsondumbo natse oshowo okuholeka oshili kombinga yiita, mbika oye ya kwathele oku gandja efano lya puka kombinga yiita mbyoka tse twa kala noku kondja uule womimvo odhindji oshowo  mbyoka yomomimvo 1987-1988. Iifundja mbika oya li yi na okulongwa nayo opo uushili wu hokololelwe  oshigwana. Mu Desemba 1987 onda tseyitha edhikopo  lyoNAMPA – the Namibian Press Agency –iilonga yolutu lwoku kundaneka nduka oya li okugongela oonkundana kombinga yekondjelomanguluko okuza moombelewa moEuropa, America, Asia osho okuza mo Africa moHarare, Dar-es- Salaam, Brazzaville nomoAddis Ababa. Oraata ya Namibia yIigwana yaHangana nayo oya kwathele moshikonga shika shoku gandja oshili kiikundaneki muuyuni sho Oraata ndjika  ya li ya ningi oshigongi moLondon. Oshigongi shaatoolinkundana  yaza miilongo yi li pomuthika opo tagu putuka osha li wo sha ulike nkene South Africa ta popi iifundja kombinga yonkalo yiita moNamibia. Onda li poshigongi shoka  ongo omuyenda a simana, naashika osha li sha ningilwa mo Atlanta sha Georgia mo USA muApilili 1988. Otwa li wo twa pandula iilonga mbyoka ya longwa ko Namibia Communications Centre mo London, endiki ndika olya kala hali andjaganeke oonkundana ndhoka dha zi meni lya Namibia okuza koongeleka oonkwaLutheri nadhilwe moNamibia.Oonkundana ndhika odha li tadhi gandja uumbangi woshili waa shoka tashi inyenge moNamibia  pethimbo ndyoka.

Mu Juni 1988, onda gandjele omushangwa okupitila moNAMPA moka nda yambidhidha shu udhapo omakankameno gAngola na Cuba kombinga yoonkundathana dhombili na South Africa oshowo na America ndhoka opo dha adhika dha tameke. BBC okwa li kundaneke shika a kondjitha shoka sha adhika sha kundanekwa kutya anuwa tse otwa li inaatu panda molwashoka inatu kwatelwamo moonkundathana ndhika.Pethimbo lyoonkundathana ndhika olundji South Africa oye a li ena ondjo moku dhi kateka nomatompelo ogendji gaana oshilonga.Ngame onda li nda yi ko Stockholm oku ka tsakanena nosheendo oshinene shaatiligane , mboka nde ya kwashilipaleke kutya tse ngele otwa kuthako ewiliko mo Namibia otatu ka kala nomakwatathano omahwepo nepangelo lyomoPretoria na ishewe itatu ka kuthako omaliko ogendji oku ga ningapo gopashigwana. Onda endulula wo kutya otatu kala noku yambidhidha ANC okupitila moOAU, moUN oshowo mehangano lyo Non-Aligned Movement”.

Ngaashi ashike aluhe, ekankameno lyetu lyopaudiplomate olya li lya pewa eyambidhidho moNamibia momwene. Aailongi mewiliko lyehangano lyaailongi nenge Namibian National Student’s Organization (NANSO), oya li ya longo neitulemo no nomukumo. Oshoka moshiwike shotango sha Juni 1988 aalongwa omayovi 75 000 oya li ya boikota  oosikola oshilongo ashihe. Okuboikota huka okwa tamekwa kaanasikola yoPonhofi mboka ya li ya taya pula opo okamba yaakwiita ndjoka yili popepi nenongelo lyawo yi kuthwepo.Oshoka aakwiita oya li taya longitha osikola ongo eshigogameno lyawo uuna mbaka ya ponokelwa koPLAN.

 

Ehololomadhiladhilo ndika olya fala mekwatepo lyaalongwa yamwe opamwe naalongi yawo. Aanasikola oya li ya ulike yena uukumwe oshoka  aanasikola yomuumbugantu nayo oya li wo ya tindi okuya komanongelo omolwashoka ooyakwawo muumbangalantu oye li moku boikota ootundi.

Mu Juni  20 no 21 omumvo 1988 ehangano lyaniilonga lyoNational Union of Namibian Workers olya ti napa ningwe oshipotha  komahangano gaaniilonga ngoka ge li iilyo yoNUNW okuyambidhidha aanasikola, kombinga yekuthopo lyookamba dhaakwiita popepi nomanongelo, oshowo emangululo lyoonkwatwa dhopapolitika, netembudhomo lyetanga lyo Koevoet momalukanda. Ngoloneya  oshowo epangelo lyoopapeta lyopakathimbo oya li ya yamukula omaindilo gaantu mbaka nomukalo gwelongitho lyoonkondo.Omainyengo ngaka ga ningwa kaanasikola oshowo kaaniilonga oga ulike kutya aantu ya Namibia oya li ye na ondjuulukwe yoku kala ya manguluka yo ishewe oya koneke kutya  emanguluko lyawo ka lya li we kokule nando..

Esiku eti 29 Septemba 1988 olyo lya li tango lya ziminwa ku Reagan na Gorbachev moka ando omo omatanga go UN nenge UNTAG ga li gena okuthika moNamibia . Ndika olya ka pingenwapo kesiku 1 Novemba 1988. Omasiku agehe ngaka oga piyaganekwa koonkambadhala dha South Africa oku ya moshipala emanguluko unene tuu sho a kwatakanitha emanguluko lya Namibia  nezemo lyaaCuba mo Angola.Oshowo ishewe ya indile kutya Angola na ethepo okuyambidhidha ANC. Oshinima shika oshe ya pe ompito opo ya kuthemo aakwiita yawo mboka ya li ya kondekelwa moAngola, ye shi ningi meholamo.

Oonkundathana dhombili odha inyengithwa okuza ko Brazzaville tadhi yi ko Cairo noko New York sigo mu August koshigongi shokoGeneva. South Africa okwa li ta kondjitha natango okupitila mepangelo lyopakathimbo kutya napa ningwe oshigongi shoongundu adhihe omanga okatokolitho 435 inaa ka tulwa miilonga. Ngame onda li nda yamukula kutya ehala ewana lyoonkundathana ndhoka olyo etulo miilonga lyokatokolitho 435 taka endele pamwe nomahogololo mewiliko nometonatelo lyIigwana Hangano.

Euvathano opo okatokolitho 435 [1978],ka tulwe miilonga olya li lya  shainwa poUN moNew York momasiku 22 Desemba 1988 moka mwa tokolwa kutya haka ota ka yi miilonga mesiku 1 Apilili 1989.

LEAVE A REPLY

Please enter your comment!
Please enter your name here