Ombelewa yoikwameni mOshakati oi li pokupatuluka

0
210

ONGWEDIVA – Konima yeedula dihapu okudja pemanguluko loshilongo, ovanambelewa ovayakuli mombelewa yoikwameni loshilongo mombelewa yakula mOshakati, ova kala nokuyakulila mombelewa ya finana.

Ongalo ei, otai hale okuxula shaashi nondjodi yepangelo okuyandja omayakulo elixwapo okoshiwa otai wanifwa oshivike tashiya, eshi omayakulo paife taa ka yandjelwa mombelewa ipe yoikwameni yoshilongo mOshakati pamufika womakwatafano opashinanena.

Edi, oda tumbulwa komupeduwiliki weembelewa doikwameni yoshilongo moitukulwa yokolundume lwoshilongo Oshana, Ohangwena, Omusati noKunene Isack Hamwaanyena. Metungo mu na eembelewa dihapu, omu na oipundi ya wana kukala omutumba ongudu yovayakulwa va li hava fikama monhele ya finana pope neembelewa daMangestrata mOshakati.

Ombelewa i li poushakeneno wepandaanda laRobert Mugabe naImmanuel Shifidi, otai ka yakula eyakulo lopashinanena eshi omauyelele aeshe momapeko makulu a tapelwa meekompiuta notashi ka kala shipu okumona ouyelele wa keshe omuyakulwa ngee a kanifa eedokumende ilo tadi pukululwa.

Hamwaanyena ta fatulula kutya, eyakulo otali ningwa mefimbo lixupi.Konyala ongudu yovanhu ve dule 200 ohava yakulwa mefiku mombelewa yoikwameni loshilongo okupewa eedokumente dopashiwana, nokudja paife ombelewa otai ka dula kuyakula omwaalu udulife pwaao wovayakulwa voshito.

Hamwaanyena okwa tumbula kutya, opo u kale omukwashiwana waNamibia ongee u na eedokumente doukwashiwana waNamibia. Ta weda po vali kutya, ngaashi naanaa ombelewa ya kala nokuyandja omayakulo eendjapo domadalo, oumutwe, eepasport, eendjapo domahombolo, eendjapo domafyo , eedokumente kovatembukili mo oshoyo eekopi deedokumente domaludi, natango otai twikile nomayakulo oshito.

Omukwatelikomesho weembelewa 19 moitukulwa ine kolundume lwoshilongo, oku na omukumo kutya, ombelewa ei hai yandje eyakulo Omaandaxa fiyo Etitano shamha ya nangala, otai ka eta po elunduluko li iwetikile noku shakenifa ondjodifaneko yepangelo okuka fika komudo 2030.

Nande eedokumente ngaashi eendjapo domadalo hadi yandjelwa moipangelo omo hamu dalelwa ounona, ounona ovo va dalelwa momaumbo vahapu kave na eendjapo domadalo, onghee ota indile ovo ve na ounona vehe na eedokumente va monenwe eedokumente dopashiwana. Okwa teelelwa oministeli yoshikondo shoikwameni yoshilongo Pendukeni Ivula Ithana a patulule etungo lipe papangelo.

LEAVE A REPLY

Please enter your comment!
Please enter your name here