Omukiintu ta monitha iihuna othigwa yamumwayina

0
250

ONGWEDIVA-Aakalimo yomondoolopa yaNdangwa otaya hokolola kutya Josephina Haikali ota monitha othigwa yamumwayina iihuna sho tali po iimaliwa ya yo yuuthiga nomwana.

Okanona haka kokakadhona koomvula 13, anuwa ohaka lala miinhwa ethimbo nethimbo, nolwindji ohaka lala wo nonandjala, nonando ohaka pewa oshimwaliwa soka sha nunimwa oothigwa kepangelo.

Aandangwa mboka anuwa haya telekele okanona haka uuna ka lala nondjala oya hokolola kutya omunona ngoka oha mono iihuna unene na iha mono esiloshimpwiyu lya gwana.

Ihe nando opena omapopyo ta ge mu lundile Haikali okwa ti omunona ngoka okuli monkalo ombwaanawa na ohe mu sile oshimpwiyu ngaashi naanaa ha ningile uunona we no waamwayina mboka eli nawo megumbo lye.

Okwa ti kutya okanona haka ohaka lala shili omathimbo gamwe pondje yegumbo no nale omanga yi na eli momwenyo osho ka li haka ningi.

“ Okanona haka oka kala na yina mOshakati omanga ina keya ku ngame ashike oka kala nale haka lala miihwa yina sho ata meke okukala hayi koongeleka ndhoka oompe opo dheya mo mOshakati,” Haikali a ti ngaaka.

Okwa ti kutya yo nofamilia ye oya kuutumba nale opo ya kundathane kombinga yonkalonawa yokanona haka ashike sigo ongashingeyi okanona haka ohaka zi mo ashike megumbo opo ka kalale miihwa moka taka vulu okuninga omasiku nondjala noomuzalo gwosikola gwa kaka.

“Oonkambadhala otwe dhi ninga nale okukwathela okaana haka na otuli natango metifa okuka kwathela,” Haikali a hokolola.

Ashike aashiinda sha Haikali mboka itaya vulu ku tumbulwa komadhina ku Kundana molwegameno nekalekepo lyuushiinda shawo, omunona nguks gwomimvo 14 oku li ta monithwa iihuna na okwi ikalekelwa megumbo.

“ Okanona haka ka kena esiku ka zala oshinima oshipe kolutu, ngele owe ka mono ka zala oshinima sha yela oka kulupithilwa kooyakwawo mboka yeli megumbo,” gumwe gwomaashiinda a hokololele Kundana.

Aashiinda oya ti woo kutya okanona oko tuu hoka ka keshi nokuli kutya uutoye wokutala oTiivii owu li ngiini oshoka anuwa ohaka kala ka tongolwa pooyakwawo.

Ashike shika Haikali ngoka eli omutekuli gwokaana haka okwedhi ikala no kwa ti kutya kadhina uushili washa.

“ Ngame megumbo ohandi zimo tandi yi ko Angola oshoka ondili omumvuntu, onkee nduno ohandi thigi omunona nguka eli nooyakwawo megumbo ihe kandi shi kutya yo ohaye muningile shike,” Haikali a hokolola.

Okwati kutya oshiwike sha ziko opo ashike a zi koAngola na okwa adha nale omunona nguka a za mo megumbo eli miihwa uule woshiwike ashihe.

Okanona haka Kundana ita vulu oku tumbula edhina lyako opo kaa tule onkalo ya ko momalimbililo, ohaka yi kosikola pOlukolo mOndangwa keli mondondo ontiheyali nuumvo.

 

 

 

 

LEAVE A REPLY

Please enter your comment!
Please enter your name here