Oondjombo odha simana

0
231

ONYAANYA – “Omusika nenge oondjimbo odha simana ongo ondjila onkwawo oku taandelitha elaka etoye lyehupitho.”

Ndika etumwalaka lya gandjwa kOmusitagongalo, Eino Nangula pethimbo a li a popitha oshituthi shoondjimbo moshikandjongeleki shokuuzilo shoka sha ningilwe megongalo Onyaanya oshiwike shayi

Nangula okwa dhenge omuthindo kesimano lyoondjimbo a ti omusika oyina oshilonga oshinene no tayi kwatha miinima oyindji, ngaashi okuhumitha komeho onkalonawa yomuntu,hayi yeluthapo omadhiladhilo ga gwa pevi,yo ohayi kuthapo uuwehame.

“Oondjimbo ohadhi holola puuyelele omaiuvo gomuntu,ohadhi nkondopaleke wo omadhiladhilo no tadhi tungu ekwatathano ewanawa,uukumwe,uukwawo wanankali,oondjimbo odho wo oshilongitho okulonga aantu oohapu dha Kalunga,yo omusika muuyuni oyo oshilonga oshinene okugandja etumwalaka lyehupitho nolyombili kaashitwa ya Kalunga,” Nangula a ti ngaaka.

Okwa ti ondjimbo dhopambepo aluhe otadhi kwatha oku kuthamo omuntu muuwianyi noku mu fala mondjila ombwaanawa .Otadhi itedhululitha omuntu, onkene omwiimbi kehe oye omuuvithi oshoka ota gandja etumwalaka lyehupitho okupitila moondjimbo.

Moondjimbo omuntu ota popi naKalunga, te mu pandula,ta hambelele no ta kugile ekwatho ta galikana, ye ta indile.

“ Ongeleki oya koneke ondjundo yomusiki momagongalo, onkene oya gandja iinakugwanithwa kaayakuli naakwanegongalo oku yi humitha komeho.

Moku shininga nena oshilonga shayo otashi tsakanithwa,ELCIN ina tala ando omusiki onga oshinima oshishona aawe, ihe osho oshinima shina ondjundo noshitopolwa sheuvitho lyelaka etoye lyOmuwa,” Nangula a gwedhapo.

Okwa ulike kutya omusika uuwanawa owundji otayi kwatha opo tu simaneke Kalunga momakana nomomitima,otayi kwatha muukwambepo noku hwameka eitaalo,otayi longo aaimbi noshowo yalwe oohapu dhaKalunga,otayi ku itaalitha mu Kalunga,omusiki otayi shitulula woo omadhiladhilo no tayi gamene omadhiladhilo gaantu kiinima iiwinayi.

“Otatu tegamene elongelokumwe unene tuu miinima tayi gumu uukriste wetweni, oshinakugwanithwa shimwe oshinene shombelewa yetu osho okupendulapo uukriste okupitila momusiki wu kale wu na omwenyo momagongalo nomongerki ayihe, okuhwahwameka elongo lyuukriste, opo uukriste wu longwe mongerki, nomomagongalo, moosikola dhooSoondaha oshowo momagumbo. Oondjimbo oshitopolwa shelongo nehwahwameko,” Nangula ta fatulula ngaaka esimano lyomusiki.

 

 

 

LEAVE A REPLY

Please enter your comment!
Please enter your name here