Ovanambelewa voshikondo shoundjolowele moNamibia novaAngola va shakena

0
165

ONGWEDIVA – Ovanambelewa 17 voshikondo shouhaku vaNamibia veendodo da yooloka, ova shakena novanambelewa voshikondo shouhaku shaAngola mOndjiva. Elalakano okutula po elongelokumwe moipambele youndjolowele koitukulwa yokeengaba daNamibia naAngola. Edi, oda tumbulwa komunambelewa omukwatakanifi woundjolowele moshitukulwa shaHangwena Angolo Angolo.

Osheendo shovaNamibia mwa kwatelwa ovakwatakanifi voundjolowele moitukulwa Ohangwena, Oshana, Omusati noKunene okudja Kotoba 28-fiyo efiku 01,2014 ova shakena pEkuma mOndjiva shaAngola novawiliki voundjolowele vokoitukulwa shaCunene noshaNamibe , va kundafane nghee ve na kukandeka etandavelo lomikifi domikwayu mwa kwatelwa HIV/AIDS, oTB, noMalaria netunhilo movakwashiwana va ama keengaba daNamibia naAngola.

Ova kundafana etumino lovanaudu okudja koshipangelo shaNdjiva moAngola okuya kEngela moshitukulwa shaHangwena oshoyo koshipangelo shepangelo shakula shaShakati moshitukulwa shaShana,tava tumbula koupyakadi wetumo lovanaudu koshitukulwa shaNamibe ovo hava pitile kOndjiva omolwa ondjila.

Shikwao vali ova tala keyambidido lomatunhilo nomikifi yomikwayu va shiive nghene ve na kukwafela oshiwana shokomikunda deengaba pokati koilongo ei.

Patomhelo eli, omukalelipo wehangano loundjolowele mounyuni moNamibia omundokotola Monire Islam nomunambelewa wehangano eli e lile po oshitukulwa shomatunhilo Petrus Mhata navo ova kufa ombinga meenghundafana edi.

Oshoongalele osha tala yoo kefimano lomukalo wedipao leemwe nomai ado okukandeka omukifi woMalaria, osheetwa po eshi sha etwa po kepangelo laAngola. Angolo ta weda po kutya, nande oshoongalele sha tula po omaudafano mahapu a kuma oundjolowele, ova tala kutya natango omapangelo otaa teelelwa a kundafane ihapu ya kuma oundjolowele woshiwana pakulongela kumwe nomahangano ehefi opapangelo, omalelo eeMunicipaliti novanambelewa voundjolowele va ete po natango omikalo da yooloka opo va kandeke etandavelo lomikifi tadi dulu kutambulwafanwa kovakali peengaba.

Angolo ta yelifa kutya, ongudu yovanambelewa voundjolowele moishiindalongo ei, muMaalisa ova shakenene mOndangwa moshitukulwa shaShana okupopya oipambele youndjolowele. Oshoongalele osha tokola shi ka shakene muApiilili 2015 moAngola koshitukulwa shaNamibe, shi ka kwatele mo novanambelewa vopolifi, ovanambelewa veembelewa doupitilo keengaba va kale yoo ombinga yomatokolo moku nghonopaleka oyoongalele yoitukulwa komikunghulo yeengaba nokuunganeka eemhito deshakeno pamufika wodistrika, pashitukulwa ashishe nopandodo yopashiwana.

LEAVE A REPLY

Please enter your comment!
Please enter your name here