Para-athletes ya fuula pomathigathano gomanyakwa gopashigwana

0
183

WINDHOEK – Okudhana kwaadhani yena uulema  ehuliloshiwike lya yi okwa li kwa fuula  aalongekidhi yuudhano woManyakwa gopashigwana gena uulema moVenduka.

Okomittee yoNamibia Paralympic  (NPC) oya ningile uudhano uutitatu womanyakwa gopashigwana nenge National Paralympic Championships pokapale kEmanguluko Etitano nOlyomakaya .Omuwiliki omukuluntu guudhano waadhani yena uulema, Michael Hamukwaya okwa ti uudhano wonuumvo owa li uuwanawa okuyeleka naamboka wa li wa longekidhwa omimvo dha piti.

“Aatondoki oya li yi ilongekidha nawa oshoka oya li ye shishi kutya oshike sha tegelewa kuyo.”Monale okwa li ha ye ya ashike koVenduka okuthuwapo  ndele haku thigathanapo, ndele nuumvo omudhani kehe  okwa li eetelele oongaku dhe dhuudhano oshoka kehe gumwe okwa li eshi kutya osha simana okukuthombinga moshinima shika,” osho a ti.

Okwa ti aatondoki oya li yuudha einekelo mwene na oya dhana onga aadhani paithano moku kala mokapale. “Oya ndhindhilike kutya osha simana okusindana oombandi  okudhi sindanena oshilongo shawo,” osho Hamukwaya a dhenge omuthindo.

Aadhani yena uulema yoo  Lahja Ishitile, Thomas Kamunime, Rosa Mandjoro, Eino Mushila, Anghuwo Erastus na Ashingali Nguluwe oya ulike kutya yo otaya vulu okusindana oombandi molwa Namibia momathigathano gomonakuyiwa.

“Otwa li naadhani taya dhana nawa mokapale mehuliloshiwike unene tuu naadhani moshinyangadhalwa sho  T11 moka omutondoki ngaashi Thomas Kamunime a shongo Ananias Shikongo moshinano shoometa  100, 200 noshowo omathele 400.

Moshitopolwa shoomeme sho T12, Rosa Mandjoro okwa li a fuula okutala na onda li ishewe nda fuulwa ku Lahja Ishitile, ngoka ngashingeyi ena omwago mokudhana,” osho a tsikile.

Okwa ti Namibia okwa tegelela okumona  Johanna Benson moshitopolwa shuudhano waalumentu mokategory  T37 moka Hanghuwo Erastus a li a matuka nawa nawa miinano yoometa 100 oshowo shoometa  200.  Omudheuli nguka okwa ti Namibia okwa ningapo elunduluko ewanawa na okwa ulika kutya osha pumbiwa opo ku talike kiinyangadhalwa yuudhano mbyoka yomokapale yaashi yomobaana okudhingoloka okapale.

“Pethimbo lyuudhano womanyakwa otwi ilongo kutya aamatuki nenge aadhani oyendji mboka ya kambadhala omaudhano gomeni lyokapale opo ye shi ningi lwotango. Yamwe yomuyo opo ya umbu ongalo lwotango nenge egonga lwotango nenge ya undula ondjumdo lwotango, naashika kashili nawa nando,” osho Hamukwaya a ngungutula.

Okwa ti okudheula aadheuli ya za kiitopolwa na ko otaku ka monenwa ompito  oyindji.”Otatu ka tala kutya otatu ka tothamo ishewe omaludhi geni guudhano mbuka ngele otwa hala okuyambulapo nawa aadhani nuudhano waantu yena uulema moshilongo,” osho a uvaneke.

 

LEAVE A REPLY

Please enter your comment!
Please enter your name here