Shinime Shiivula oye enyakwa muudhano woCricketa

0
248

ONGWEDIVA-Shinime Shiivula oye enyakwa epe lyuudhano gwoCricketa hayi dhanwa kuunona womimvo 7-14 ndyoka lya li lya unganekwa kolutu wiliki lwoCricket moNamibia mondoolopa yaNdangwa Olyomakaya ga ziko.

Shinime okwa li a ulukile oosikola oonkwawo komutse gwondjamba sho ali a mono omasindano ogendji momadhingoloko guudhano mbuka nokwi ilikolela ehala medhingoloko lya hugunina, moka ali a tsakanene nOsikola Etambo Primary School.

Nando edhingoloko lya hugunina olyali itaa li nuwa meya Osipana yaShinime oyali ya pitile meyulu lyonane oku shi shipondola okudhengamo Etambo Primary School nokumatuka lwomu 19 oshowo ya kanitha aadhani yatano omanga Etambo lya yambukamo nomamatuko ge li omu 17 oshowo ekanitho lyaadhani yeli yatano.

Shinime okwa li a pewa ekopi noombandi dhoshingoli, Etambo olya yakulapo ehala etiyali noombandi dhoshisiliveli.

Olukolo Primary School olwali lweshipondola okudhengamo Wendy Private School nomamatuko geli 24 mekanitho lyaadhani yatano, nokuya pehala etitatu mpoka yali ya pandulwa noombandi dhoshikushu.

Pafunisia Josua ngoka eli Omunashipundi gwoCricket mOshana okwa holola enyanyu lye sho omwaalu gwuunona mboka wa kutha ombinga moCricketa tagu ende guuka pombanda gwaya pombanda moshitopolwa.

‘’Tse mewiliko lyuudhano woCricketa otwa li twa longo nuudhiginini, miikonga yomapendulepo guudhano woCricket mOshana naashika oshetu etele iiyimati iiwanawa,”Pafunisia ta ti.

Pafunisia okwa pandula wo oCricket Namibia pamwe na FNB sho haya yambidhidha iikonga yomapendulepo goCricket moNooli ta indilile oosikola dhi longithe ompito ndjika opo dhi humithe komeho omaudhano go Cricket.

Oosikola dhili hetatu odhali dha kutha ombinga muudhano mbuka wa li wa dhanwa uule woOlyomakya ga ziko pokapale ka Heroes Private School mOndangwa.

LEAVE A REPLY

Please enter your comment!
Please enter your name here