Edhipago komunkulofuta lya halutha aakalimo yomoKuisebmond

0
304

WALVIS BAY – Omatumwalaka gomahekeleko oga tsikile okutuminwa ezimo naakwanezimo lya Louise Alupe ngoka a dhipagwa kukuume ke komiihole, anuwa Omaandaha oshiwike shika molukanda lwaKuisebmund mOmbaye.

Onkundana yeso lye oya li ya taandele mbala okupitila momakwatathano gopankalathano mointernet, moka oshigwana sha li sha haluthwa noonkondo koshiningwanima shika. Omatumwalaka gomahekeleko oga tumwa okuza kookuume ke nosho  wo kwaamboka ye mu shi ye mu hokolola omuntu gwaantu omwiifupipiki ena omutima gwoshingoli.

Oshiningwanima shika osha halutha aakalimo yomoshilando shokomunkulofuta  sho ya kundana edhipago lyomukiintu omugundjuka anuwa a dhipagwa komumati gwe komatango gOmaandaha oshiwike shika.

Okwa hokololwa omunamimvo 24 Louis Alupe a  li a mangwa komeho ge omanga  inaa yahwa okusa komumati gwe gwomimvo 30.Omufekelwa ngoka wo a li a kambadhala oku idhipaga oku li moshipangelo kohi yetonatelo lyopolisi a tegelela aaluke opo a falwe kondjedhililo nokompangu.

Opolisi oya ti edhipago ndika oli na oku kala lya ningwa pokati kotundi 16h00 sigo opotundi 18h00 komatango gOmaandaha.

Edhipago olya ningilwa  pomandeina geli popepi nomunkulofuta gwa Independence Beach ngoka kaa gu li kokule nomagumbo ngoka ge li popepi nago.

Omufekelwa ngoka eli omukwati gwoohi anuwa okwa yaha Alupe momutse eshi ningi eli popepi  elela. Okuza mpoka okwa ulike ondjembo momutse gwe, ndele ndjoka ina yi topa shono a hili onkandja opo andola iidhipage.

Okwa kambadhala oku idhipaga nomakende gatatuka konima sho iitete omuthipa gwoposhikesho, ndele onkambadhala ndjoka na yo ina yi mu dhipaga.

Oonzo odha lombwele Kundana kutya osheeti sheso ndika ooshoka anuwa sho nakusa Alupe a ti ina hala we okukala mohole nomufekelwa . Ye naku hengwa nguka okwa hekemo Alupe maandjawo opo anuwa ya ka kundathane ekwatathano lyawo lyohole.

Okwa itaalwa kutya omufekelwa okwa kutha Alupe paandjawo nokwa hingi na ye sigo opondeina komunkulofuta.

Omukwakanithi gwopolisi moshinima shiilonga iiwinayi moshitopolwa Erongo, Omukonakoni Omukuluntu  Iikuyu  okwa koleke oshinima shika shedhipago nonkambadhala yoku idhipaga. Okwa ti ishewe omufekelwa moshinima shika ota pangwa moshipangelo kohi yetonatelo enene lyopolisi.

Iikuyu okwa ti pehala mpoka pwa ningilwa edhipago ndika lyaana omutse nondungu , mbaka yaali oya li ya mangwa komeho yalala pamwe moondeina.”Alupe okwa adhika a ya nale ndele omufekelwa okwa li natango ena omwenyo na okwa falwa meendelelo koshipangelo shepangelo shaMbaye,’ osho a fatulula.

Okwa ti otashi ulike kutya aaholathani mbaka oya li yena uupyakadhi mohole yawo, okwa ti mbaka kaya li haya zi pehala nenge megumbo limwe.  Alupe okwa kala mepandaanda lya  Kwilimba  moTutaleni omanga omufekelwa okwa li hazi mepandaanda lya Marlyn Cresent mo  Kabeljou .

Iikuyu okwa ti aakalimo popepi nomunkulofuta oya uvu omutopo gwondjembo na, oyo ya tseyithile opolisi  posasiona ya Kusiebmund.

Omufekelwa okwa tegelelwa okuholoka mompangu ya mangestrata metamaneko lyedhipago uuna a lalekwamo moshipangelo.

KuEveline de Klerk

 

LEAVE A REPLY

Please enter your comment!
Please enter your name here