Mbidi otashi vulika a ka sindane po uupresidende woNFA

0
239

WINDHOEK – Otashi vulika ethigathano omolwa oshipundi shuuperesidende waNamibia Football Association (NFA) li kale ashike lya uka ombinga yimwe unene tuu sho olutu nduka lwa ulike nale kutya olwa yuulukwa omuuhogololwa, Frans Mbidi, ngoka kwa itaalwa kutya ota shi vulika oye a ka sindane oshipundi shika.

Mbidi oye gumwe gwookandidate ndhoka tadhi kondjele oshipundi shika pamwe nomunashipundi shewilikongundu lyoBlack Africa oshipuna shomoshilongo, Ranga Haikali. Mbaka ya ganeke iikaha yawo opo ya hogololwe ongo aaperesidende yo NFA. Ndika olyo ehogololo etiheyali okuza tuu nkene oshipundi shika sha totelwe omumvo 1990.

Omauliko oga li ga hulu momasiku 8 gomwedhi nguka noshigongi shokuhogolola osha thanekwa oku ka kalako momasiku gahamano gomwedhi tuuka pehala inaali tseyithwa natango.

Olutu lwokuwilika omahogololo lwiithikamena lwaantu yatatu otalu ka wilika ehogololo ndika kohi yeenditho lyomutseyinawa gwomaudhano, Moses Ikanga, Ambrosius Tierspoor na Africa Jantjies. Mbaka yatatu otaya ka gandja oamthaneko gawo konima yoku konakona ngele aaningi yomaindilo mbaka oya gwanithapo iipumbiwa opo ya hogololwe ongo aawiliki yetanga lyokoompadhi moshilongo.

Moonkundathana na Kundana  Mbidi, okwa ulike olupandu lwe kombinga yomukalo gwelongekidho sigo oompaka na okwa itaala kutya ye okuna ashihe sha pumbiwa opo a humithe komeho omuthika guudhano wetanga lyokoompadhi.

“Oshilalakanenwa oshipu, ngame otandi  ka pulakena  komalutu ngoka geli iilyo yehangano lyetu noku tala nawa shoka go ga tegelela okuza kutse ndele hago taga pulakene kwaashoka tatu.Elalakano oku mona kutya oompumbwe dhaambako  odho dhini noku mona omayamukulo nkene ndhika tadhi kandulwapo,” osho Mbidi a ti.

Mbidi ngoka eli momalutu ga NFA molwashoka okwa kaleapo oshitopolwa shaShana momaudhano okuna elalakano nondjodhi yoku yambulapo omaudhano.

“Tse ongo aawiliki yomaudhano tse aapiya yaantu na otuna oshinakugwanithwa oku yakula muuwanawa waantu yetu. Shika otashi vulu oku adhika uuna twa tulapo omalongekidho noondjodhi dhopondondo dha yooloka, kokutya omalalakano ngoka twa hala oku adha mbala, oku adha meni lywethimbo lyomimvo dhili pokati oshowo ngoka ge thimbo ele naashoka shasimana oku kala wo tuna aantu ye na owino yokolela okupititha nawa nokutula nawa omathaneko nomalandulathano ngaka miilonga,”

Okwa ti okudhikapo noku kalekapo ekwatathano ewanawa nomukwashilipaleki guudhano mbuka MTC ota shi kala shimwe shiilalakanenwa ye ngele okwa  ningi omuperesidende gwo NFA.

“Opena ompumbwe okukoleka ekwatathano  ewanawa na NPL mwakwatelwa nooliha dhopevi muudhano wetanga lyokoompadhi ngele otuna elalakano okutungapo olutu lwoonkondo lwokuwilika uudhano moNamibia.”

 

LEAVE A REPLY

Please enter your comment!
Please enter your name here