Omunangeshefa a yandja okashina kolusheno koprojeka yovakainhu

0
239

ONGWEDIVA – Omunangeshefa mwene weengeshefa dEyambeko, okwa yandja omaano okashina kolusheno kokupomba omeva momboola koprojeka yovakainhu yedina Ondjobo ili moshikandjohoololo shaRuacana moshitukulwa shaMusati.

Eshina lakula longushu yoN$ 20 000, ola longekidwa pakwatakanifo lomunambelewa moStandard Bank yaShakati, Phillip Ashimbanga melongelokumwe naNgolonea woshitukulwa shaMusati ,Sophia Shaningwa ou a tambulila ko eshina eli pongeshefa yoomunangeshefa Kumar Vinod “Kuku Agri” mOshakati, oshivike sha djako.

Ngolonea Shaningwa ta yelifa kombinga yoprojeka yovakainhu Ondjobo moshitukulwa shaMusati ya kala ya pumbwa omeva i dule kuya komesho noilonga. Oprojeka Ondjobo yaKalunga – ediva laKalunga li na omutamo u fike lwopeemeta 10 okuuuka medu, alushe omwa tuta, la pumbwa kukonaakonwa kovashiivinawa va tale apa hapa di oshituto. Ediva lopaushitwe wa dingililwa komamanya li li mofaalama yovakainhu ya tulwa nale oluumbo, mu na oumenye vaheyali vayandjelwe komufinghenda umwe, hava nu omeva a enda komitwe, nande popepi nalo pa xupwa eemboola fiyo opapa ihadi andjaneke omeva.

Ngolonea Shaningwa ta weda po ta ti, ovakainhu moprojeka ei i li popepi noshikunono Etunda hamu longwa oihape, shamha va tungilwa eenduda dokuyakula ovaenda, otava ka dula kutelekela ovatalelipo oihape. Okwa pandula omunambelewa woStandard Bank Filip Ashimbanga ou e va kwatakanifa nomunangeshefa omufinghenda Moses Kambwali weengeshefa dEyambeko pEpalela, kEtunda, kOutjo, Otjiwarongo oshoyo kOndjiva nOnamakunde moAngola , eshi a uda ko efimano lokukwafela ovakainhu ovo itava dulu okufika peenhele opo pe na omakwafo.

Ashimbanga,omunailonga mombaanga e na ookaume vahapu, okwa didilika nghee sha fimana va longele kumwe naNgolonea Shaningwa okukwafela ovakainhu.

Omunangeshefa Kambwali otaka tula mo eshina lolusheno lokupomba omeva. Natango omunangeshefa woilongifo mounamapya “Kuku Agri”Kumar Vinod womOshakati opo pa landwa eshina, poo opo la yandjelwa kuNgolonea Shaningwa, okwe liyamba neeN$150 000 okuxupa omboola tamu ka tulwa eshina lokupomba omeva kuKambwali.

Shaningwa ta tambula eshina longushu N$20 000 tali ka pomba omeva, novakainhu otava ka dula okuwapeka onhele mokulongifa omeva. Okwa ti,natango otava pumbwa eyambidido okukandula po eemhumbwe doprojeka yavo .Kuku Agri okwa kwafela nale eeprojeka dovakwashiwana koitukulwa imwe ngaashi koshitukulwa shaKavango.

 

LEAVE A REPLY

Please enter your comment!
Please enter your name here