Okugalukila kegumbo konima yomimvo 30 muundjendi

0
260

Omanga inaa ndi thikama okushuna kegumbo esiku lya landula onda taamba onkundana yoluhodhi okuza ku Hailwa Hage Geingob kutya Hailwa Anton Lubowski okwa dhipagwa kaantu yaa shiwike.Mesiku eti 14 Septemba 1989, omukulukadhi gwandje nongame, twe ende pamwe nanakusa Moses Garoeb oshowo aanambelewa yalwe yoSWAPO otwa thikama okushuna koNamibia.Otwa li twa hehela ondhila yiilonga yomOmbepo ya Ethiopia opo yi tu fale kegumbo.Ondhila ndjika oya li tayi hingwa kaaEthiopia oshowo kaaNamibia mboka yiilongela okuhinga oondhila moEthiopia.Pokapale kaLuanda,Omuperesidende Jose Eduardo dos Santos, oominista dhocabinet naanambelewa yopombanda oye tu laleke noku tu halela ondjila ombwanawa oshowo iikonga yomahogololo yili nawa.Konima yo kutuka ethimbo lyootundi mbali netata otwa lambele pokapale ka JG Strijdom Airport (ngashingeyi haka ithanwa Hosea Kutako International Airport).

Konima yoku lambela onda ipumu mumwe nangoloneya gwepangalo lya South Africa,ngoka natango oye ali omuwiliki ,nonando aaniilonga   yoUNTAG opo ya li pokapale .Ngoloneya gwepangelo lyokatongo okwa li a tindi okupitika aathaneki ya kale kombinga yokapale hoka haku lambele oondhila opo ya thaneke sho tandi zi mondhila.

Onda lombwele aanambelewa ya South Africa naamboka ya UNTAG kutya ngame itandi zimo mondhila sigo uuna ndoka iikundaneki oshowo ayehe mboka yi ile yatsakane kendje inaa ya pitikwa oku ya kombinga ndjoka kwali kwa lambela ondhila yandje . Kombinga yandje ngoka nda kondjela emanguluko lyoshilongo shika omimvo 30 kandali nda hala okugalukila kegumbo nda fa tandi iyakelemo okupitila kokantu.Onda li nda hala oshinima shika shi monike kwaayehe noku kundanekwa uuyuni auhe unene tuu omathano niitya yesindano ndika.

Konima yominute 20 omanga tapa kundathanwa ngame nosheendo shandje otwa kala twa tegelela, eindilo lyandje olya ziminwa opo ihe onda zimo mondhila, no nda kundwa tango kOmukwatheliperesidende gwoSWAPO meni lyoshilongo nakusa Nataniel Maxuilili,nakusa Omupevi Peresidende Hendrik Witbooi na Hailwa Hage Geingob. Nguka okwa li a humbata epandela lyoSWAPO ndyoka nde mu pele momasiku 18 Juni 1989 sho a li molweendo okuya kegumbo sho a li eya nondhila yiilonga yomOmbepo ya Zambia, epandela ndika okwe li galulile ndje. Mbaka oya landulwa ku meme omuholike nakusa Helvi Mpingana Kondombolo, pethimbo ndyoka a li ena omimvo 89 na okwa li eweteko nawa ye ishewe okwa li ta ende uukilila.Onda tsu oongolo nokuthipa evi eholike Namibia “Oshitunda shOmapenda.”

Otwa pitile metungo lyokapale neendelelo nokuya mosheenditho shoka sha li shetu tegelela oku tameka ondjila yetu yoshinano shookilometa 45 okuya koVenduka.Oshilandopangelo shetu shoka oshali olukalwa lwaHerero, Aanama na Orlams omanga Aandowishi inaa ye ya moNamibia.Oshilando osha li sha tungilwa mokati kiikulundundu onkene ehala lyopopepi ewanawa nokutunga okapale koku lambela oondhila olya li kokule .Ihe nando ongaaka ondjila okuza kokapale oya li yuudha aantu sigo omoVenduka ya li ye ya okutsakaneka ndje pamwe naanambelewa yalwe yoSWAPO, mbaka oyo aayambidhidhi,  yoSWAPO iilyo yongundu, aalumentu naakiintu yomoshitunda shaandjetu ayehe mbaka oya li ye na ondjala nenota  lyeithikameno nemanguluko.

Onda ka kundana konima kutya sho nda thiki pokapale opwa li ekuyunguto lya holoka po  sho aanambelewa yegameno yo SWAPO ya ndhindhilike omunambelewa gwiilonga yomeholamo ya South Africa ngoka a li  tegela opo a dhipage ndje pethimbo tandi heluka mondhila. Omunambelewa nguka okwa kuthwamo mokapale komanganga.Ndika olyo limwe lyomomatompelo kutya omolwashike iikundaneki ya li    inaa ya pitikwa opo yee ya thaneke ndje sho tandi heluka mondhila.

Onkalo moWindhoek oya li yi na uuhwenge konima yedhipago lya Hailwa Anton Lubowski momasiku 12 Septemba 1989. Oombulu odha li nuuhahu oshoka nokonima sho dha shaina euvathano odha nyola kekuma lyehala lyokuthikameka omahauto, moVenduka   kutya yo oya tegelela omudhipagi Nujoma. Ihe elago enene oondika kutya , Nigeria niilongo yokoongamba  Angola, Botswana, Zambia, Tanzania, Mozambique na Zimbabwe oshowo iilyolongo yilwe yUukumwe wAfrica mbyoka ya li yina oombelewa moVenduka pamwe naanambelewa yegameno yoSWAPO oya kandeke onkambadhala yedhipago lyoshiyakela ndyoka.

Shoka ndishi ooshika kutya nonando onda kala omimvo odhindji ndishishi kutya otandi ka galukila koNamibia unene tuu sho oshilongo sha li popepi nemanguluko, okuthika kwandje moVenduka noshowo moKatutura okwa li ethimbo lyenyanyu enene lyaashi ku tumbulwa.

Pethimbo ngame nda thiki megumbo omayovi gaaNamibia oyendji oga adhika nale ga galuka muundjendi ngaashi ngame na otwa topolelathana eiyuvo ndika ewanawa lyoku galukila kegumbo.Onda kala omimvo omulongo moTanzania, omugoyi moZambia nomulongo ishewe moAngola, ndele nee kapwali hapa piti omwedhi gumwe inaandi enda okutalelapo oombinga ne dhuuyuni nenge okukala naakondjelimanguluko oshowo oondjendi momandiki gElongo noguundjolowele goSWAPO  moAngola, Cuba, moNdowishi nale yoKuuzilo , Congo-Brazzaville naZambia.

Ngashingeyi otandi kala megumbo lyandje, nomukulukadhi gwandje nezimo lyandje. Kandi shi we omuyenda nenge omweendanandjila tandi kongo eyambidhidho omolwemanguluko neithikameno lyaNamibia. Ndika olya li eyo kegumbo lyopandjokonona na ishewe olya li tali nyanyudha.

Ngaashi ashike ayehe mboka ya galuka, onda li wo nda taalelwa komashongo, ndele onda li ndina omukumo oshoka  omashongo ngaka kapwali ngoka itaa ga vulu okukandulwapo.

Omashongo gamwe ngaka ongaashi omulandu gwokatongotongo, gweyo komeho  lya yooloka pamwe nelongo lyomuthika omwiinayi  lyaaBantu ndyoka lya etapo  etopoko oshowo uutondwe pokati komihoko nomihoko.

Onda li nda ningi oshigongi shoonkundana sho nda thiki moKatutura, okuza kokapale koondhila. Poshigongi mpoka onda indile oshigwana opo shikale shina uukumwe. “Ekondjo olya li ele nelulu. Oohailwa yandje nangame otwa galuka mombepo yombili, ohole nokombanda yaayihe edhiminathanepo lyopashigwana. Okuza nena natu longeleni kumwe, mokuthigapo  oshowo okudhimbwapo ontompolwa ndjoka yuuthigwa noluhodhi. Natu fumvikeni omadhimbuluko guutondwe, omaipumomumwe, okwa inekelathana, noshowo etondathano lyopamuhoko. Natu pandjuleni epandja epe oshowo ontompolwa ompe ya tungilwa kuukumwe, ombili, uuthemba womuntu, eiyuvo lyuukwagumbo, esimanekathano, oshowo nee edhiminathanepo lyopashigwana lya za muule womitima.”

Ekondjo lyetu lyopetameko olya li tali kondjele uuthemba womuntu oshowo wo ehulithopo lyokatongo kopamuhoko nokupewa emanguluko okuza muukoloni. Onda li nda yelekanitha oonkambadhala dhaapolisi nale pethimbo lyomimvo dho petameko ya kambadhala okudhipaga ndje ndele ina ya pita. Ishewe moku galuka kwandje oya li wo ya kambadhala ya dhipage ndje ndele nonkambadhala yawo ndjika oya ndopa.

Onda li negumbo moWanaheda, oshitopolwa shaKatutura , otwa li megumbo lyoshinanena ndyoka lya li lya landwa koSWAPO. Katutura, ngaashi ashike Oshakati  oya li iilando iinene, mbyoka nda li inaandi thigapo pethimbo nda yo muundjendi moBotswana  1960.

Onda ka lala ndina omadhiladhilo ogendji na onda penduka ongula nontseyo kutya ondi li megumbo, no shinakugwanithwa shoka nda thigilwa kuChief Hosea Kutako ,Samuel Witbooi noSWAPO konyala shili popepi noku manithwa.”

Osha li momadhiladhilo getu kutya oshitopolwa shimwe shoshilongo shetu, WalvisBay oshowo uuntuntu komunkulofuta owa li natango miikaha yomukolonyeki.

Esiku lya landula onda yi ndi kiishangithile omahogololo noku tsakaneka ooyakwetu moshikondo shomahogololo okukundathana omashongo ngoka twa taalela.Aa South Africa oya li nale taya pendje oombedhi, sho Pik Botha a yamukula koshigongi shoonkundana mpoka ndali nda gandja uusama ku South Africa kutya oye a eta omadhipago nehalakanitho  muumbangalantu mesiku 1 Apilili 1989, oshowo medhipago lyaHailwa Anton Lubowski.

Sigo onena ndjika edhipago lya nakusa Anton Lubowski onde li tula miikaha ya F.W.de Klerk niilonga yomonanguwi yaakwiita yepangelo lyomwaalu omushona lya South Africa.

 

LEAVE A REPLY

Please enter your comment!
Please enter your name here