Omapapa guudhano wetanga lyokomake ga pewa ospana yoHPC

0
172

ONGWEDIVA- Osipana ya Hifikepunye Pohamba Campus  Volleyball Club ya toolapo omapapa ogendji poshiindingili shegandjo lyomapapa shuudhano wo Volleyball shoka sha li ko ehuliloshiwike lyaziko mOngwediva.

Shika osha etithwa sho yali ya mono omasindano muudhano wa wo awuhe womomukokomoko gomumvo guudhano woVolleyball 2014.

Muudhano wotate Osipana yaNakapele Volleyball Club oyo omusindani guudhano woliga yokoNooli noyali yapewa okapandi ko N$2000, tayi landulwa  ku HPC ndjoka ya pandulwa no N$1500.

Osipana yo Six Stars oye ya pehala etitatu moka ya pewa okapandi ko N$ 1000, nOhangwena Nampol ye ya pehala etine noku hekelekwa nokapandi ko N$ 500.

Muudhano woomeme HPC oye ta pangele sho eli oye omusindani gwoliga ndjika, nokwa mbendekwa N$ 2000, Otjozondjupa Nampol oye ya pehala etiyali tayi pewa N$1500.

Nakapele okweya pehala etitatu moka apewa N$ 1000, omanga Osipana ya Six Stars yali ye etelele okano pehala etine moka nayo yali ya mbendekwa okapandi ko N$.

Aanambelewa mboka haya unganeke uudhano mbuka nayo wo oyali ya pewa olupandu sho yali ya enditha nawa iinyangadhalwa yomaudhano ngaka.

Ewilikongundu lyuudhano woVolleyball olya li wo lya gandja epapa koshifo sha Kundana na New Era sho ya kala noku nyanyangidha iikwamaudhano yawo momukokomoko gwomumvo.

Omunashipundi gwoVolleyball koNooli Paulus Mulunga oya tokola okugaluka nomomumvo tagu ya 2015 sho taya ka tameka nomumvo guudhano.

“Otwahala oku andjaganeka uudhano mbuka miitopolwa ayihe yomoNooli unene tuu moosikola, otatu ka kambadhala wo okwiindjipaleka omwaalu gwaakwashilipaleki, noshowo omwaalu gwOosipana guye pombanda”.

Oshituthi shegandjo lyomapapa oshali sha kalwa kaadhani naanambelewa yomaudhano opamwe naakwashilipaleki yaza ko FNB ngoka oye eli omukwashilipaleki omunene.

KuShipi Elago

LEAVE A REPLY

Please enter your comment!
Please enter your name here