Eefya da shituka oita

0
302

ONGWEDIVA – Eenghali domukainhu umwe womEembidi daKapulwa moshitukulwa shaHangwena oda xulila moshinima shafa oshinyandwa, ile omuvi yOshiafrika eshi vamwe vomoonakufiwapo vati va tameka tava nanafana, tava dengafana, voo vamwe tava di omawi a fa oinamwenyo.

Omolwa oiningwanima oyo i tilifa, vamwe vomovalila fya ova faduka po nokulihana mo meenghali da meekulu Merjam Nghihangwa (66), vati va tila oku tala oipwe.

Otaku hokololwa kutya ounona va nakufya Merjam tava yambididwa kuvamwe vomovakwapata vaina ova tameka nokupopya oinima ihafele, voo tava ninghile xe nooxegona omatilifo, a kwatelwamo edipao.

Umwe nokuli womeefiye edi, omukainhu vati okwa denga nokutaataela xe, Elifas Shiingidwa Shitaleni (72), moixwa omo aka hangwa kovakwapata emu kala omutumba medimo, temu pondo, omanga omesho axe taa wilauka.

Kakele kokupondwa, omukulupe Shitaleni, oo a kala va hombola nomukulukadi waye oule weedula da yuka po 50, okwa keelelwa filufulu a tale omudimba womukulukadi waye. Omudimba vati ina u talwa nande okomulilafya umwe, kakele kofamili ya nakufya Merjam yo vene.

Ounona vanakufya nooinagona, vati fiyo opapa ina va holola kutya omolwashike va ningila oinima oyo.

Oiningwanima ei, naikwao ihapu, oya hokololelwa yoo Jeremia Nghaamwa, hamushanga wamwene womukunda Eembida daKapulwa oo naye a hala opo ounona vanakufya Merjam va pulwe novayelifile ooxegona kutya omolwashike velihumbatela ngaho meenghali.

“Ame ita ndi ti onda ponda tate ile inandi muponda, ka ndali momhepo yokudimbulukasha. Kashiimba onde shi ninga ngaho. Tate okwa lombwela nge ta ti onda li ndi kwetwe kovakwamhungu, oinima aishe oyo nda ninga ina ndi i ninga kwaame mwene. Omhepo oyo ohai hangenge natango, ndee nee hasho sho kushikulwa,” Elizabeth Shitaleni, oo vati a hangwa ta kendabala okudipaa xe, pamukalo woku mu ponda, ta ti.

Luise Ndeshaanya, okandenge komukulupe Shitaleni a filwa omukulukadi waye ota ti ye keshi naana kutya oshike sha etifa oikolokosha, shaashi eshi va kala nanakufya, nounona vanakufya, ina va kala ngeno ve na oita.

“Ondaka mona ashike manga tu li meefya efiku loshivilodimbuluko, omulumenhu ou woshiveli sha nakufya a fikama, nokuteya oshiti, ta ti: ‘eenghali mboli da ninga mbali vakwee’ a hala okudenga mumwameme umwe womulumenhu, ye takwatwa kuvakwao.” Ndeshaanya ta hokolola.

Ndeshaanya ta hokolola kutya suwala shaye, okwa xulifa mo mafiku Oktoba 17, 14 konima eshi a kala ta vele, oule weedula mbali.

“Ashike eshi tu li meefya, otu udite ounona va nakufya, tava ula xe kutya oye a dipaa ina. Katu shi nee kutya ota shi ti ngahelipi.

Pakuhokolola imwe yomwaayo ya ningwa po Ndeshaanya ota ti, ongula yefiku la shikula epako, Elizabeth okwa tameka ashike  takwena ekweno limwe likumwifa, nohaluka okwa nhukila pediko, te lidedaula mediko, nokutameka ta di omawi afa oinamwenyo. Opo nee okwa nhukila xe, ta tameke te mu denge yee temu taataele moixwa, vati naye moixwa a ka ninge oshinamwenyo.

Nokonima eshi ovanhu ve va shikula, vati ova hanga eli xe omutumba medimo te mu pondo, nomesho axe taa wilauka.

Ndeshaanya, mokukendabala ngeno a kufe ko okakadona kumumwaina, okwe ke li hanga ashike a nangala pedu.

“Kandishi kutya pedu onda ya po ngahelipi, nounyuni owa tameka wa laula, kwafa ashike kwa wiwila, ame vali onda puka. Ame oinima oyo onda kala ashike handi i udu tai hokololwa, ina ndi kala nde i itavela, ashike paife onde i mona nee,” Ndeshaanya ta hokolola nonghumwe.

Konima omukainhu ou novamwainamati vavali, vati ova ka kala tava popi kutya otava dipaa xe, nooxe vamwaina va xe veli vavali, ashike eshi ina shi ka ningwa.

Konima eshi eenghali da hanauka po, ovakwapata va Shitaleni ova ya koomwene womukunda opo ngeno eefiye novakwapata vanakufya Merjam va ifanwe voo va hokolole kutya oinima ei va ninga oikwashike naana, ashike inava ya ko. Eshi osha eta opo elelo lomukunda li tumine oshipofa eshi kopolifi yoo i ungaunge navo.

Mongaha, Elizabeth, ounona vaye nounana vavamwaina ovo va li hava di mooxe, aveshe vati meumbo ova tembuka mo, ve li vaka mo omanga xe ali a ya poundingosho. Ava vati ova dikula mo oipileke oyo ya li ya dengelwa mooxe nokutapa mo yoo oilya mokaanda, tava fiye xe oye aeke meumbo.

Elizabeth edi okwe di koleka ta ti ye okwa fiya po eumbo laxe shaashi opena oshinima hashi mu hange ngee eli meumbo lavo, sha tameka okumuhanga konima eshi ina a xulifa.

Komutoolinghundana

LEAVE A REPLY

Please enter your comment!
Please enter your name here