Eenhana Primary School odho enyakwa guudhano woGalz and Goals

0
226

EENHANA – Oprima sikola yEenhana oyo yuulikwa enyakwa muudhano wetanga lyokoompadhi lyaakadhona ha wu ithanwa moshitakumi Galz and Goals.

Osikola ndjika oya li ya mono oshishani shopombanda shika piitelekela yokugandja omapapa komanongelo ngoka ga kuthombinga muudhano mbuka sha ningilwe pendiki lyEenhana Multi-Purpose Olyomakaya ga yi.

Aadhanitanga yaakadhona mospana yaadhani kohi yomimvo 13  oya li ya pewa oombandi dhoshingoli, oshisiliveri oshowo ndhoka dhoshikushu opamwe nekopi ndyoka hali yugathanwa poshiindingili shika.

Osikola ndjoka ye ya pehala etiyali ya landula Eenhana oyo Otaukondjele Combined School ndjoka ospana yayo Amaroka ya longo nawa noku mona oombandi dhoshisilveri, omanga ospana Super Strikers yokenongelo Ohehonge Combined oyo ya kuthapo ehala etitatu.

Sigo oompaka oospana omilongo 49  dhaakadhona dha za moshitopolwa Ohangwena odha li dha kuthombinga  muudhano mbuka. Aakuthimbinga oya dhana moliha yuudhano mbuka shi ikwatelela kuukuluntu wawo yamwe oya dhana mospana yaadhani kohi yomimvo- 13, kohi yomimvo – 15, kohi yomimvo -17 oshowo mboka ye li kohi yomimvo 20.

Omukwatakanithi guudhano wEenhana Galz and Goals,  Frederick Sitali okwa ti ongundu longekidhi ye oya ulike kutya oyi na eitulomo okunkondopeka aakadhona tashi pitile melongo lyuudhano wetanga lyokoompadhi. Oha ya longo wo aakadhona okuya pa ontseyo kombinga yuuwanawa mboka tawu ya zile moku kuthombinga muudhano wetanga lyokoompadhi.

“Tse otwa pandula wo eyambidhidho nekwatho ndyoka hali tu zile koshitopolwa shOmaudhano muuMinisteli  wAagundjuka nOmaudhano, moku kwathela etulomiilonga lyoprograma ndjika pomuthika gwoshitopolwa oshowo gwopashigwana.

Omapapa ngoka ga gandjwa Olyomakaya ndjoka ya yi oga li ga kwashilipalekwa komalutu ngaashi UNICEF, Internationale Zusammenarbeit (GIZ), UNAIDS osho wo SCORE (Sports Coaches Outreach) ngaka oga gandja iimaliwa mbyoka ya longithwa uule womumvo aguhe,’ osho a fatulula.

Uudhano mbuka wetanga lyokoompadhi waakadhona owo osheetwapo shaningwa melongelokumwe pokati ka Namibia Football Association (NFA), UNICEF, SCORE, GIZ na UNAIDS okunkondopeka aakadhona oshilongo ashihe. “Mboka twa shoneka aakadhona unene yomimvo pokati komu 9-15 opo ya mwenye muundjolowele, sho taya kuthombinga  muudhano wetanga lyokoompadhi.

Elandulathano lyuudhano mbuka olya shoneka okuhwepopeka uunongo kombinga yonkalamwenyo oshowo okukeelela aagundjuka yaa kwatwe koHIV/AIDS. Otayi lalakanene wo oku yambulapo omuthika gwe iyalulo mwene lyaakadhona mbaka , oku ya pa uunongo  opo ya ninge omahogololo guundjolowele. Oshikwawo oku pa aakadhona aagundjuka mbaka ompito yokudhana etanga lyokoompadhi oshowo okulundulula eitaalo mokati koshigwana ndyoka li na egamo okudhina aakiintu,’ Sitali ta fatulula.

Pethimbo ndika oludhi luudhano mbuka ohali dhanwa  miitopolwa yili 10 moNamibia ayihe, moka odoolopa kehe hayi longekidha omatyapulo gayo yene oshowo oliha yawo yuudhano mbuka.

Omumvo 2010 konyala aakadhona 1 101 oya li yiishangitha mopolograma ndjika yoGalz and Goals. Uudhano mbuka owuna aadheuli yaadhani mbaka yeli 180 mboka ya dheulwa momusindalongo kombinga yonkalamwneyo oshowo kombinga yokudheula kwopetameko.Elongo lyaadheuli ndika olya gandjwa pa longelokumwe noNFA na SCORE Namibia.

Mike Hamunyela ngoka wo a popi poshiithanene shika okwa ti oshinima shika osha pendutha ohokwe onene moshitopolwa nosha tonatitha aakuthimbinga miitopolwa ayihe. Lovisa Mulunga (15) okwa ti  “Opoloyeka ndjika oya kwathandje  unene oshoka onde shi pondola okukala kokule niinima iiwinayi mbyoka tayi ningwa ngashingeyi kaanona yepipi lyandje ngaashi okunwa omalovu. Ngame otandi hogolola okudhana etanga pehala lyoku kala tandi longo shoka inaashi opala. Oshikwawo eshongo enene ndyoka tse twa taalela oondyoka lyo HIV/AIDS  oshowo esimbapalo lyaanona aashona.’

“Omulongwa omukwawo gwomograde 7 penongelo Otaukondjele Combined School, Millicent Hikuam (11) okwa ti, “Okumwenya muundjolowele otashi ti oku yanda oku ya momilalo naamati yepipi lyandje . Ondi na wo okukala kokule niingangamithi, okunana omakya  oshowo okunwa omalovu. Otwa ilongo wo oshindji kombinga yookondoma ihe ngame otandi kala oshilyo shospana Amaroka osigo uuna ndoka nda piti okuya kondondo  8.”

KuClemence Tashaya

LEAVE A REPLY

Please enter your comment!
Please enter your name here