Ewiliko loSwapo lapandula Nandjigua

0
355

ONGWEDIVA- Eshi omupresidente  Hifikepunye Pohamba a shiivifa etameko loikonga yomahoololo muKotoba 2014,  eshi osha  pendula omhepo yomaudife ko nohokwe yokuudifa ko oshiwana momikalo da yooloka.

Tutu Nandjigua, mwene wongeshefa  Earth Moving Equipment Diesel and Petrol Mechanic okwa yandja oshihopaenenwa shiwa kovanangeshefa nokovanyasha ovo ve li oilyo yoSwapo moshitukulwa shaShana nopondje yasho.

Poshoongalele shoSwapo sha li mOshakati omwedi ou  okwa pewa olupandu leedola N$15 000 kewiliko loSwapo mOshakati molwa oupenda wokweeta po edilaadilo okukambainina omuulikwa President wongudu yoSwapo Dr Hage Geingop.

Oupenda waye owa pandulwa pefimbo ovanangeshefa voSwapo moshitukulwa shaShana va fikamifwa poshongalele shoSwapo mOshakati va pandulwe eshi va ongela po eemilyuna N$ 8,7. Pefimbo opo tuu opo okwa pewa olupandu ku hamushangandjai woSwapo, Nangolo Mbumba  e mu shiivifila kutya oSwapo otai mu pe omahooli a fike koWindhoek nomatuwa aye ehuliloshivike ladjako.

Nandjigua ota ti, okwa kala e udite efimbo loikonga yomahoololo itali fiki, shaashi okwa hala kuulika eliudo nehalelo laye, omukumo neineekelo moSwapo la twikwa mo nale kuxe ou a li he va tulike metuwa nokuya koyoongalele yomaudife ko omahoololo manga a li okaana inaka fika  peedula dokuhoolola.

Molwa ohole yoluvala lepandela loSwapo, Tutu okwa painda olutu loFord yomodel 1974 momukunda  lihe na oingina oluvala lepandela loSwapo, a kufa oitenda koikwakwa yeeFord da teka  a ninga eedula 3 ta pangele a dule okuli longifa moikonga yomaudife ko. Okwa xwikila okatemba omo a londeka oLanducruiser ha yeende a ulike eenghono doSwapo. Vahapu mokumona etuwa eli, poshoongalele shongudu shokEenhana moshitukulwa shaHangwena, ta i kOshikango, kOmufiya, mOshakati, nOkomungwelume ovanyasha  novakulunhu ova fuuka. Omapandela ane oluvala loSwapo, a li a tula ko tete okwa mona kutya otae lidungu, opo nee a ka hondjifa omapandela aeshe kumwe  30 a lekwa koitenda ya xwikilwa ketuwa. Nande hashi mu pula omahooli mahapu ina sholola onghee olweendo lokuya keembelewa doSwapo koWindhoek efindano linene kuye okuyambidida ongudu nomuulikwahoololwa wayo moikonga yomahoololo yoneudo.Olomakaya la djako Nandjigwa okwa li a kwatele komesho osheendo shOmuulikwaPeresidende Hage Geingob okudja keumbo laye Casa Rosalia mOushilo wa Venduka okuya kokapale kOmundohotola Sam Nujoma oko kwa ningilwa oshoongalele shaxuuninwa shoikonga yomahoololo shoSwapo.

Komutoolinghundana

LEAVE A REPLY

Please enter your comment!
Please enter your name here