Hogolola opo ewi lyoye li uvike  

0
234

Ongula mefiku 2 Novemba olya igidhwa esiku lyefudho lyopashigwana , opo shika shi gandje ompito komuntu kehe a hogolole momahogololo gOshigongi shOpashigwana oshowo gOmuperesidende.

Ndika olyo ethimbo opo tu tule ni omategameno getu gopapolitika ongo oohandimwe miilonga. Esiku ndika 28 Novemba olyo ethimbo ndyoka konima yomimvo ntano kehe, Aanamibia ayehe haya pewa ompito okulongitha uuthemba wawo wuudemokoli wokuhogolola opo konima kaa ya ka kale nokupopya kutya ina ya pewa ompito yasha.

Epangelo lyaantu ohali hogololwa kaantu ndele ha komwaalu omushona gwoohandimwe ayeke. Ngashi oshipopiwa mayele hashi tomona kutya aagundjuka oyo aawiliki yokomongula mbaka otaya kala ashike aawiliki ngaaka ngele oye li oshitopolwa shomulandu guudemokoli uuna na yo taya ka hogolola. Onkene alikana aagundjuka indeni mu ka hogolole.

Oshikwawo tse ongo aagundjuka otwa gwana oku kala tu uvite etumba nuuntsa omolwombili nengungumano ndyoka oshilongo shetu sha kala noku tyapula na otashi tsikile nokutyapula sigo onena. Onkene osho oshinakugwanithwa shetu ongo aagundjuka okukalekapo uuthiga mbuka okupitila momulandu guudemokoli, gumwe gwaangoka ogwo okuhogolola nenge omahogololo.

Manga oyendji yaaNamibia yi impwiyika nonkalo yomahupilo moshilongo, noya fa taya dhimbwa  oshinima sha simana shengungumano lyopapolitika, ndyoka lili moshilongo molwashoka aaNamibia ayehe oye na esimaneko lyuudemokoli, uuthemba womuntu oshowo ekotampango lyoshilongo.

 Kundana okwe shi popile nale na oteshi endulula ishewe  momapandja ngaka; kutya Ekotampango lya Namibia otali pula omuntu kehe gumwe okukuthombinga  mokuhogolola epangelo ndyoka wa hala, eeno osho shili kutya ongundu ndjoka ya mono omawi ogendji oyo tayi ningi ongundu ompangeli nenge tu tye ongundu tayi kwatele ewiliko lyiikwashigwana komeho noku utha kutya oonzo dhoshilongo otadhi topolwa ngiini.

Ongundu tayi pangele naanapolitika yayo  kokutya oohandimwe mboka taye tu kalelepo tse atuhe ongo oshilongo ashihe mepangelo ndyoka, pomuthika guupitithi, pauperesidende, paparliamende sigo opo ndondo yoshitopolwa, iilando niikandjohogololo.

Omahogololo kage shi oshinima ashike shoongundu dhopolitika ndele oshinima shopashigwana.Onkene elalakano lyoongundu dhopolitika okugandja uusama koKommissi yOmahogololo ya Namibia nali kale lya kankamekelwa komukanka gwoongundu tadhi longo iilonga yadho yoku humitha komeho ekoko muudemokoli ndele haku kambadhala oku ikongela iitsa yombiliha yopapolitika

Oye na oku kambadhala oku adha epotokonono lyomikundu konima yoku taambako ECN ongo omulongeli kumwe omwiinekelwa.Oshoka uuna pwaa einekelathano okuza koombinga adhihe, mbaka otaya kala aluhe ye wete ECN itaa longo nawa nonuuyuki.Oongundu adhihe dhopolitika odha pumbwa okukondjitha onkalo kehe yokwaana ombili ndjoka tashi vulika yi holoke moshilongo, onkene odhina okuulika uukuluntu momukalo ngoka tadhi taamba iizemo yomahogololo. Okugandja iizemo yomahogololo mbyoka inaa yi kolekwa itashi ka kwatha nando olye kakele ashike koku eta ombepo yuutile moshilongo .Otwa pumbwa okupa ECN ompito opo a longe iilonga ye ehulilo shiwike ndika.

Lwa hugunina kashili nawa okukala inoo hogolola nenge okudhina omahogololo ngoye konima to ka nyenyeta kombinga  yaamboka ya hogololwa okuyakula oshigwana poondondo dha yooloka. Unene tuu ngele ino ninga sha mokuhogolola aawiliki mboka ngoye wa hala no wu wete oyo ya gwana nenge yoopala okuwilika pomuthika nguka nenge ngwiyaka. Shika oshafa ashike oku kuna ombuto ye kuyunguto papolitika moshilongo ndjoka tayi vulu oku piyaganeka engungumano nombili moshilongo ndjoka yi limo oshoka yalwe oya longitha uuthemba wawo wuudemokoli, okuyelaka naamboka ya tindi oku shi ninga.

Onkene ngele ino panda epangelo ndyoka lili koshipundi inda wu ka hogolole aawiliki yalwe yaa shi mboka taya lele nena, ishewe ngele oholomende ndjoka tayi wilike owe yi nyanyukilwa oshoka oye ku gwanithilapo omategameno goye nomalalakano goye, oshike ito ya hogolola ishewe, ongo omukalo oku ya pandula molwa oku sila oshilongo naantu yasho nawa oshimpwiyu. Okukala inoo hogolola kashina shoka tashi ku etele itashi popilwa sho ishewe itashi tsu kumwe nomadhiladhilo guukilila.

LEAVE A REPLY

Please enter your comment!
Please enter your name here