Omatala aShakati okuli pokunangala

0
278

ONGWEDIVA – Omatala  omalandifilo  mOShakati oo a tungwa oule weedula nhee koshimaliwa sheemiliona N$18 okuli pokupwa a tameke okulongifwa  kovalandifi ovo va finana pomatala makulu e li moupepi noshitauwa shakula sha pita mOshakati.

Ongudu yovalandifi voilandifomwa yomaludi ve dule po 400 oya teelelwa i tembukile komatala a tungwa pashinanena. Edi, oda yelifwa komunambelewa omupopili ko wElelo laMuni wodoolopa yaShakati, Jackson Muma.

Omatala taa tungwa kehangano  China Ziang okwa tukulwa pashinanena eembinga da yooloka onghee ovalandifi vombelela ova tulwa kombinga yavo kuna eekila dokutalaleka, onhele yokushashaulila ombelela noshiyofelo.Eshi omatala ape taa ka patuluka petameko lomudo 2015, ovalandifi voikutu ova amekwa ombinga yavo, ovalandifi voikulya yopamufyuululwakalo ova tulwa koshitukulwa shavo eengeshefa domaludi oda longekidilwa eenhele dado she li kwatelela koludi loilandifomwa.

Muma ta fatulula kutya, kakele kombelewa yomukwatakanifi woinyangadalwa pomatala, natango ope na ongulu yoyoongalele, ombelewa tamu shangwa omadina ovatwaalelwa meembesa omo tava futile. Etembukilo komatala mape, otali ka kufa po omukundu womalondekelo eebesa da finda koitukulwa ya yooloka yoshilongo, eshi tadi ka londeka meshikulafano da tungilwa po onhele yakula ya wana eebesa dihapu. Muni okwa tula po yo onhele yakula yokukulama omatuwa ovalandi pomatala tai pashukilwa komwaameni womaliko, naashi otashi kwafele okuya moshipala oulunga womomatuwa ponhele yomalandifilo ei.

Ta weda po vali kutya, molwaashi odoolopa yaShakati oya nenepala ovatalelipo ava itava ka mona omhito yokweendaenda keembinga adishe dodoolopa, otava dulu kutala efewa lodoolopa mokulonda koshungo yokutala kokule ya tungwa pomatala . Momatala oshinanena  aShakati, otamu wana ongudu yovalandifi vahapu, novalandi otava ka yakulwa noupu eshi ovalandifi voilandifomwa yomaludi e li fa tava amekwa nombinga.

Muma okwa fatulula yoo nghee Elelo lodoolopa yaShakati la ninga omalongekido okutunga po eenhopa nhatu mOshakati nokuwapeka omulonga womatondokelo omeva opo efundja ngee tali tukuka liha kungulukile meni lodoolopa. Omatala mape aa a shaamafana nongalashe yoToyota  mOshakati, okwa ama koshana ashike omatondokelo omeva okwa ningwa nawa opo omeva a ha kungulukile mokati kovanhu ovo tava ka landa ile tava landifa oinima yavo.

Komutoolinghundana

LEAVE A REPLY

Please enter your comment!
Please enter your name here