Shipindo natango ota pula komeho

0
195

OKAKWA – Omuhiki goongalo a tseyika nawa nedhina Julia Shipindo natango onkene ta pula komeho noongalo dhe. Shipindo omukadhona goomvula dhopokati elela.

Shipindo pamapulapulo okwati okwa tameka okuhika nokuimba oongalo okuza mo2007. “Onda kala ndili mompumbwe yoshimaliwa sho osho inandi vula okupititha oalbuma yandje mbala, onda kala tandi kongo omayambidhidho mOmbaye sigo nda mono opo ndi pitithe oalbuma yandje,” Shipindo tati ngaa.

Okwali a pititha oalbuma ye yotango omumvo gwa ziko ndjono tayi ithanwa Uupongo. Moalbuma ye ndjika omuna uungalo omulongo nakamwe mono muna uungalo ngaashi uupongo,Alpha na Omega, Mama, Uuyuni na Kokule okutumbulapo ashike wumwe.

Shipindo moalbuma ye muka okwa imba oongalo dholudhi lwogospel,house oshowo dho afro-pop. Okwa kwathelwa kaahikingalo ngaashi Mike,Chester,Meicy,Kinzzo na Young Ben ashike konyala moongalo dhe odhindji okwa imba oye awike.

“Moongalo dhandje onda popyamo iinima yi na sha nonkalamwenyo ndjono tayi nyengathana,oshowo ndi imba kombinga ya Kalunga ngono eli omugameni gwetu,omuna woo okangalo kamwe hono tandi pandula nakusa Abrahm Iyambo kwaashi etu ningila nokwe tu longela pethimbo ali momwenyo,” Shipindo ta ti.

“ Onda kwatwa kohokwe yokuhika oongalo manga ndali mepipi eshona lela na onda tokola opo ndi tameke okwiimba oongalo ngame ndi tale ngele tandi shi pondola oshoka gwonale okwa tile okukambadhala okuvule okumwena, nondina omukumo kutya otandi ka kala omuhikingalo omwaanawa monakuyiwa,”Ta gwedhapo ngaaka.

Oongalo dhe odhindji odha kwatelwa moostudio dhokoSouth Afrika nokomunkulofuta. Shipindo okwati okuna edhiladhilo opo a pitithe oalbuma ye ontiyali petameko lyomumvo taguya, no kwa indile koshigwana shi mu yambidhidhe a vule oku pititha oalbuma ye ndjoka a dhiladhila, ta gwedhapo kutya mo albuma ye yotango okwa kwathelwa pashimaliwa ku yina.

Okwa pandula kondandalunde ayehe mboka ye mu kwathela, naangoka, wa pumba oalbuma ndjika oto vulu ku mu dhengela yemwene ko 0818235077, ko oko to vulu oku mona uuyelele wa gwedhwapo. Ota monika moshitopolwa shaHangwena. Ta indile oshigwana shi pulakene etumwalaka ndyoka tali adhika moongalo dhe. Olundji oongalo dhe ohadhi dhana koradio yOshiwambo yo NBC oshowo kwaandjoka yOmulunga.

KuMaria Namupala

LEAVE A REPLY

Please enter your comment!
Please enter your name here