Tava hepekwa koshilulu

0
328

ONGWEDIVA – Ovaneumbo vaJeremia Johannes na Ester Angula vomukunda Uuyoka mOmulondo mOshitukulwa Oshikoto, otava li tava pi, koshilulu osho vati hashi va denge shoo tashi li mo oikulya meumbo nokuva tilifa oufiku.

Ovaneumbo ava paife otava pula  ekwafo keengeleka adishe moshilongo, opo di hangane mokuva ilikanena nokuva kufa moupyakadi oo tava tengeneke wa kala eedula nhatu paife.

Kakele kokuva denga nokulya mo oikulya meumbo, oshinima eshi vati ohashi tile omakumbafa ovaneumbo omeva, eli po ena edimba nohaananunuka, sho tashi nhuka nokudana keembete davo oufiku aushe.

Eexuxwa meumbo vati paife oda pwamo shaashi ohashi di yofa po shoo tashi di kupula meumbo. Ounona ngeenge va fiye oifima ile oshivelelwa meembiya vati ohashi limo oikulya oyo meembiya, shoo tashi vake ko oshivelelwa komalimba, unene tuu ngee eedingu dombelela. Oikutu younona meumbo oha i kana mo, nefimbo limwe oinima ngee ya kana meumbo oha i hangwa ya tulwa kombada yeenduda (eengulu) ya tonywa noya dedaulwa moimbodi (oihemba).

Oshinima eshi nande sha ilikanenwa, osha mwena po ashike oule woivike ivali, nopaife osha tameka vali.

Ester Angula okwa hokololela Kundana ta ti oshilulu eshi ove shi dimbulula lela mu Apiilili woneudo eshi ovaneumbo lavo va mona omunhu ehe shivike ta teke omeva pokapomba nokuke likoshela kokalikoshelo kamwe komeumbo efimbo loufiku.

Ounona ova kendabala ngeno okutala nawa kutya omunhu oo olyelye ashike eshi va ehena popepi, vati okwa shituka po endoongi li tilifa, nova tameka tava di omaxwilili.

Eshi vati osha kala hashi ningwa luhapu fiyo efiku limwe ounona opamwe novanailonga vomeumbo va mona nokudimbulula omunhu oo vati ve wete a fa omukainhu umwe womushiinda.

“Eshi nda uda ngaho, onda ya kumwene womukunda noku mu hokololela oshinima eshi, handi mu lombwele kutya onda dilaadila opo ndi pule mushiinda oo taku ti okwa fa omunhu oo he uya okulikosha meumbo letu. Mwene womukunda ta itavele kutya eheno oshi li mondjila na ndipule ashike.

“Eshi nda dengela mushiinda ongodi okwa pula nge ngeenge onda ile keenganga, ame handi ti ahawe. Ye ta ti nandi ka ulikilwe oshili. Eshi meme oo a ti ngaho, nghina vali nghene ndi ninge, onda ya ashike kongeleka yedina Jesus Christ Ministry, oyo ye uya okuilikana, noshinima osha kala sha mwena po oule woivike ivali,” Angula ta hokolola ngaho.

Meme ou ta holola kutya, paife opo tava dimbulula kutya oshinima osho osha kala mo meumbo lavo efimbo lile, shaashi okudja tuu eedula nhatu da pita, ovanailonga ovo hava kutu meumbo ihava kala mo, na alushe ohava efa oilonga netomhelo kutya meumbo ihava kofele mo. Ashike shaashi oovene veumbo ava vavali ohava kala koWindhoek luhapu, ina va dula okumona ile okudimbulula diva kutya oshikwashike iha shi kofifa ovanailonga meumbo.

Komutoolinghundana

LEAVE A REPLY

Please enter your comment!
Please enter your name here