Welwitschias a dhengwa ishewe muudhano we

0
174

LISBON – “Otuna oshindji okulonga, itatu vulu okudhana pamukalo nguka muudhano wEkopi lyUuyuni eta tu tegelele andola tu kale twa longa nawa. Otuna oku shuna poshipelende noku itala nawa tseyene omanga inaatu tameka oku ilongekidhila uudhano wetu na New Zealand methigathano lyuuyuni momasiku 24 ga Septemba 2015.”

Ngaka omaiyuvo gakapitiya gwospana yorugby ya Namibia Welwitchias konima sho ndjika ya thiki pehulilo lyolweendo talelopo luudhano lwedhina Windhoek Draught Northern Hemisphere tour moka inaa ya sindana nando uudhano wumwe.

Kapitiya  Rohan Kitshoff okwa popi ndhika uuvite nayi konima sho ospana ye ya kanitha uudhano wayo na Portugal neyooloko lyiitsa ashike yili 9. Weltschias oya sindika kuPutu niitsa 29-20. Uudhano mboka wa dhanenwa pokapale korugby koUnivesiti ya Lisbon Namibia oye a li komeho niitsa 13-12 pethimbo oospana ndhika dha yi pokafudho.

Namibia ongo omutalelipo okwa mono iitsa yotango meni lyominute ntano sho uudhano wa tameke. Iitsa oya zi kethango lyopenalti ndjoka Namibia a pewa komuhikihiya omuArgentina, a geele Putu molwashoka okwa li ta kateke uudhano owina.Nando Namibia  a mono iitsa mbika,  Portugal oye a li mepangelo lyuudhano kokutya olundji etanga olya kala miikaha yaadhani yospana ya kaPutu. Ngaashi sho aadhani ya Portugal Nuno Penha e Costa a gandja etanga ku Jose Lima ngoka a piti pokati kaadhani yokonima ya Namibia noku ka tula etanga pevi kombinga ya Namibia kokutya a gwedha iitsa kospana ye , shika okwe shi ningi mominute 11 konima sho uudhano wa tameke. Okuza mokutula etanga pevi[okudreka], Tiago Girão okwa thangele etanga ndyoka pokati koopaala ya Namibia na okwa gwedhako iitsa kospana ye ya ningi 7-3.

Portugal okwa adhika ishewe ta yaka , naashika osha pe Kotze gwa Namibia ompito opo a thangelemo openalti ontiyali noku shonopeka omwaka gwiitsa pokati koospana ndhika okugu eta poshitsa shimwe ashike.Namibia okwa ka tameka ta dhana nawa na okwa li oye ena etanga na ota pangele uudhano uule wominute 15 nokudhana huka okwa pe Torsten van Jaarsveld opo a tulemo okoola ye yotango mokudhanena oshilongo she . Kotzè okwa gwedha ko kiitsa sho a thangelemo etanga okupita pokati kiiti  ya Portugal nongeyi Namibia okwa yi komeho miitsa neyooloko lyiitsa ihamano.Manga uudhano inaa wu ya pefudho Portugal okwa ponokele Namibia noonkondo dhe adhihe nongeyi okwa gwedha ko kiitsa ye mbyoka ya ka kala yili 12 -13 muuwanawa wa Namibia.

Oku galuka kefudho Portugal okwa li ta dhana nawa, nokwa yi komeho niitsa mbyoka ya ka kala yili 19-13 shaningwa ashike meni lyominute ne konima sho uudhano wa tameke.

Okuza mpoka uudhano owa kala tawu pangelwa ku Portugal sigo opehulilo sho nguka a ka tulamo nokusindana niitsa 29-20.

Namibia okwa kala tadhana okuza konima kokutya okwa kambadhala oku lapako iitsa mbyoka ya li yi ni we kuPortugal. Namibia okwa ningi omapuko gamwe gi igalala nongeyi okwa gandja ompito kaadhani ya Portugal opo ya tulemo ookoola.

Nando Namibia okwa kanitha omaudhano ge agehe ngoka a dhana niilongo itatu mbyoka a li a talelepo, edhengo ku Portugal okwe li talako ewinayi unene. Ewinayi molwashoka mbaka oya li taya longo nuudhigu okukala netanga uuna ye li yugu ko kaatondi yawo, ishewe omukalo aguhe gwoku dhana okupaathana etanga na gwo ka gwali omuwanawa.Okuscruma nako woo ka kwali taku ya endele nawa.

Kapitiya ngoka uuva nayi, Rohan Kitshoff okwa zimine kutya edhengo lyospana ye olye mu teyagula noku mu  shololitha. “Otwe shi iningipo tseye ,oshoka ka twa li twa landula omulandu guudhano ngoka twali twa uvathana ishewe ka twa li tatu kala netanga uule wethimbo lyontumba inaatu li kuthwa,”osho Kitshoff a ti.

Kitshoff okwa londodha kutya edhengo ku Portugal olye ya pendutha opo ya ilongekidhe tagu pu mo unene tuu sho uudhano wekopi lyo Rugby lyuuyuni lili ashike kokule kashona uule woomwedhi omulongo.

Omudheuli ta kwathele Henry Kemp na ye okwa tsu kumwe na kapitiya gwospana a ti yo kaya li taya dhana nawa muudhano wawo na Putu.Na oya pumbwa okulonga mbali lwaali uuna ya galukile kegumbo koNamibia. Okwa ti nando ongaaka muudhano muka oya ulika mo iinima iiwanawa yontumba, shimwe ooshika kutya oya li yena okukala ya dhenga Portugal ngele ando osha vulikile.Unene tuu sho nguka itaa ka dhana methigathano  lyomanyakwa go rugby guuyuni omumvo tu uka.

Komutoolinkundana

 

LEAVE A REPLY

Please enter your comment!
Please enter your name here