Mwene gwomukunda ta fekelelwa emitiko lyokanona a lalekwa pakathimbo

0
269

OSHIKWIYU – Elelo lyoshilongo shaNdonga olyali lya laleke manga mwene gwomukunda Oshikwiyu 62, ngoka a lopotwa a nuwa ningile omatilitho e tayi momilalo nokumitika okanona hoka ngashingeyi neka koomvula 17.

Omukulupe ngoka kwali oye amushanga gwomehale lyuuwa, okwali a lalekwa mo melelo momasiku 26 Novemba. Shino otashi holoka woo momishangwa ndhono dha shainwa komukwaniilwa gwaNdonga Tatekulu Immanuel Kauluma Elifas.

Ota ku hokulolwa kutya, mwene gwomukunda nguka okwa tameke okuya miihulo nokanona haka omanga kali kena oomvula 16.

Pakotampango lyoshilongo oku ya momilalo nokanona komivo 16 nenge okashona osha talika ko osho ekwatonkonga.

Konzo ndjono ya gandja uuyelele oya holola kutya, omukulupe nguka gwoomvula 62, tango okwali kuume komiihole nayamwe yomaakwanezimo yokanona haka ye li yaali, mboka yeli aakokole pomathimbo ga yoolokathana. Pethimbo sho ta lundililwa emitiko lyokanona, mwene gumukunda nguka a hokana, nokuna egumbo lye nomukulukadhi gwe gwomondjokana okwa anuwa adhika natango eli miihole na yinagona yokanona haka, ngoka eli omupambele omutitatu ta ningi kuume ke komiihole maantu yomezimo limwe. Ngele okwa gwedwa okanona haka koomvula 16, anuwa kumwe oye li yane.

Omukokele nguka anuwa okwali a pewa omalombwelo ogendji opo a kale a holoka kombala ye a pulakene kutya omukwaniilwa ote mu tokolele ngiini mu shoka a longo, ihe okwali a ponyo okuholoka. Limwe lyomomasiku sho aanamukunda yali ya gongala manga ya tega ya ka tameke iihokolola omulumentu nguka okwali a thigi po ombala manga omutumba inaangu tameka, no inaa popya kutya otayi peni.

Momukanda ngono gwa shaina kOmukwaniilwa gwaNdonga Immanuel Kauluma Elifas, ogwa tseyithile omufekelwa opo kaa ha gumesha manga sha sha pamba elelo lyopamuthigululwakalo, ye ina longawe manga iilonga yuuyene womukunda, tayi holola ngaaka kutya niilonga yuuhamushanga mehale lyuuwa ne yi hulithe po manga.

Shino oshali woo sha kolekwa kumwene gwoshipundi Olukonda tatekulu Petrus Awene, sho a fatulula kutya Ikwa okwa lalekwa mo manga melelo lyopamuthigululwakalo manga oshipotha she tashi konakonwa no kwa indilwa kaa longesha momukunda moka manga.

Tatekulu Awene okwa holola kutya mwene gwomukunda Oshikwiyu okwali a pewa oompito odhindji ashike ina holoka ngaashi a li iithanwa komukwaniilwa. “Oshali she tu uvitha nayi unene oshoka otwali twe mu inekela noonkondo, Ikwa ota katukilwa onkatu mbala koveta ngaashi ompango yilipo kutya ngele owa mitike okanona kosikola owuna ku katukilwa onkatu pa pangelo no palelo lyopamuthigululwakalo oshoka owa teya oompango dhoshilongo,” Awene tati ngaaka.

KuMaria Namupala

 

 

 

 

LEAVE A REPLY

Please enter your comment!
Please enter your name here