Namlife a gandja ookompiuta kOmpandakani

0
245

OMPANDAKANI – Ehangano lyoNamlife mOshakati olyali lya gandja omagano gookompiuta kosikola Opandakani, ndjoka yili moshikandjolongo Eheke moshitopolwa shaShana.

Aalongi, aanaskola oshowo aavali oyali ya gongala pOmpandakani metine lya piti, opo yeye ya taambe nokutala kutya omagano ya pewa kehangano  lyoNamlife. Omukuluntu gwehangano ndika mOshakati Abner Kalimbo okwali a holola kutya oya gandja omagano gookompiuta mbali oshowo oprinta kosikola ndjika opo ya tale kutya otaye dhi longitha ngiini.

“Ehangano lyetu olya panga uukuume nOmpandakani, sho osho twa tokola tu gandje omagano ngaka go ga vule ku longithwa kaanaskola, yo ya monemo uunongo wa gwedhwa po oshoka oyo oongudhi dhoshilongo shetu,otwa hala opo tu gandjesha melongo oshoka elongo olya simana unene,” Kalimbo tati.

Kalimbo okwati mo ku enda no ku talelapo oosikola odhindji monooli oyali ya mono kutya mooskola ndhoka ya talelepo odhili mompumbwe onene yookomputa nuunona otawu longwa waa hena ontseyo yo komputa, no tati otashi wu ningile oshidhigu ngele ta wuyi kiipututhilo yopombanda.

“Uuyuni wongashingeyi owa huma komeho, no tuna ku endela pamwe nethimbo opo tu kale twa huma komeho, woo uunona wetu wu kale tawu mono no ku tyapula emanguluko lyoshigwana ngaashi miilongo ya putuka,” ta gwedhapo ngaaka.

Kalimbo okwali a uvaneke taya ka kala ya landa ishewe ookomputa dhilwe opo dhi gwedhe pwaandhoka ya gandja esiku ndyoka. Omunambelewa nguka okwali woo eenda pamwe nomunasikola omukulu poskola mpoka Lazarus Kalenga ngono nokuli a lukilwapo etungo, Kalenga okwa woo a tala no ku kwata etungo lye ndyoka a lukilwa no ku uvaneka ta ka gandja omagano galwe gevulithe mpoka moshikako shotango omumvo tuuka.

Omukuluntuskola ta kwathele pOmpandakani Tomas Ananias,  pamwe niilyo yelelonongelo oyali ya nyanyukwa no ku pandula ehangano ndika lyo Namlife, tati olya longa oshilonga shasimana pomudhingoloko.

Ananias okwati oyali yena ompumbwe onene yookomputa oshoka oya kala owala yena okomputa yimwe yo ihayi longo nawa. Tati otaya ka gandja elongo lyopetameko lyokomputa kaalongwa omumvo ta guya, yo ya kale yeshi kulongitha okomputa manga taya mono dha gwanena oskola ayihe.

KuMaria Namupala

LEAVE A REPLY

Please enter your comment!
Please enter your name here