Wacca ota ti, oudano woWelwetschia owoilumbu ashike

0
194

WINDHOEK –Ehokololo inali yela tali tongo okuyahama kwomudanauki  wospana yoWelwitschia, Munee Tjiueza otaku ti olo la dopifa ospana  yaNamibia i dengwe  pefimbo lomaudano a danwa moEurope.

Eedjo dopopepi nomudanauki Tjiueza, oda holola nghee omudanauki wokomesho a ehamena moudano ngoshiima sha ningilwa owina, opo ovadanauki ovalaule  vaha mone omhito okudanauka mospana yopashiwana pefimbo loRugby Board (IRB) World Cup lodula tai ya tali ka ningilwa koEngland.

Omudanauki wokomesho moudano woRugby omuNamibia e li moshipundi shetulumuko, Wacca Kazombiaze oo a li a kalela po Namibia lwoikando ivali komafiyafano oudano woIRB kekopi lounyuni, okwa yelifa kutya mospana youdano woRugby yaNamibia omu na okatongotongo, omhepo yokakombo noludi nokaningila apa.

Ina fiya emanya la londa kulikwao eshi a popya mo aishe  kombinga yovadeuli  vopashiwana ta ti Danie Vermeulen  nomukwateli komesho NRU Sybrand de Beer kutya, nava ete po elunduluko lomeendelelo. Kazombiaze ta ti: “Onda mona kutya moudano omuna  omhepo yokutala ko ovalaule kutya oilongifo ngee tashi ya komhito yomaudano opashiwana , va talika kutya voo oilongifo momalihafifo ngee tashi ya kehoololo lovadanauki, hano va tulwa mo ashike opo ku ulikwe kutya mospana yaNamibia omuna ovadani ovalaule ashike ina shi tali ka ko onga tava dulu shili okukufa oudano worugby onga eifano”.

Ta twikile nokuyelifa kutya, ovadanauki moudano woRugby ovalaule ihava lombwelwa oshili kombinga yefimano leifano olo ile omauwa oshimaliwa shovadanauki  meifano eli. “Ovadanauki voilumbu ova dina ovalaule vehe na ouyelele naavo hava danauka nawa ihava ningwa nawa shi fike poilonga yavo”.

Mokuulika aekenyanano laye Wacca, okwa pula NRU yeete po omukalo mupe tau xulifa po olwiikiledi loilumbu hai lyoshipungo ovadanauki ovalaule moudano woRugby.

Ta ti: “Ohandi lipula kutya vangapi va didlika etomelo lakanififa Namibia eshi a dengwa mo kuKenya petameko lefiyafano loudano wekopi loIRB lounyuni koMadagascar. Omolwa epuko lopautechnika eshi omudeuli a tula Tinus du Plessis komesho yaTjiueza, enyakwa  li shii kutondoka oshikuti netanga”.

Omukwatelikomesho woNRU Sybrabd de Beer, okwa mbweenga Wacca a fa a twa kumwe nehokolo laye. Ta ti: “Ovanhu ove na kuholola omaliudo avo, ashike  ondi shii kutya omudeuli oha hoolola ovadanauki a tala koinima ya yooloka ngaashi oukolele nokokudula kwomudanauki oshoyo okudilaadila meendelelo she likwatelela nghee ta danauka nawa ponhele opo a tulwa.

Ovadeuli ove na elalakano lokwoongela ospana tai dulu kuyambula po epandela loshilongo.

“Ashike ovo va li mospana pefimbo lolweendo poLichten Strasse ,ova lombwela oshikundaneki Kundana kutya, Wacca okwa tonga oshili ihe na kuholekwa”.

Corrie Mensah eshi a pulwa a tye ko sha, okwa anya kutya sha ta ti okwe lipyakidila nekonaakono lehokololo lovadanauki ovaNamibia inave shi endifa nawa kolweendo lokoEuropa

KuCarlos Kambaekwa

LEAVE A REPLY

Please enter your comment!
Please enter your name here