Natu simanekeni elongo lyaanona

0
220

KuMaria Namupala

EPEMBE – Kansela gwoshikandjohogololo Onayena Max Nekongo okwali a kumike aavali opo ya simaneke elongo lyaanona yawo.

Ndhino kansela Nekongo okwali e dhi popi pethimbo ta popitha aavali mbono ye na uunona hawu hiti oskola pOkanaimbula, yili moshikandjolongo Epembe moshitopolwa shaHangwena. Okwali wo a popitha aalongi oshowo aalongwa poskola mpoka.

Etine lyoshiwike sha piti poskola pOkanaimbula opwali pwa longekidhwa esiku lyowina lyegandjo lyomapapa, kwaamboka ya longa nawa. Nekongo moshipopiwa she okwali eshu nunina unene aavali mbono e wete kutya oyendji yomuyo inaya itulamo melongo lyaanona, te ya indile opo ya taleko elongo kutya olya simana unene.

“Aavali atuheni otwa hala aana yetu ya pondolesha moonkalamwenyo dhawo, sho osho twaeya tumeni kooskola, natu ulikeni ohokwe meyokomeho lyiilonga yoskola yaanona tse tu ya hololele kutya melongo omuna uuwanawa was hike, na tu simanekeni okuya kiigongi yaavali, tse tatu pulakene nkene uunona wetu hawu ihumbata ngele weya kootundi,” Nekongo tati ngaaka.

Nekongo ta gwedhako ta indile aavali ya pitike aanona ya longe iilonga yawo yoskola, yo ye yatse omukumo ye yi gwanithepo pethimbo lyuuthwa. Okwa indile aavali ya longele kumwe naalongi opo ya tule pokati aanona no ku wu kondeka, opo aanona ya vule ku itulamo miilonga yoskola, tati aavali yamwe ka yena ko nasha noskola yaanona noyendji oye ethelapo aaalongi oyo ayeke haya popiko ashike aavali oyo ye na ku kutha ombinga onene meputudho lyaanona yawo.

Konima ashike yoomwedhi dha piti kansela Nekongo okwali a ulikwa kelelonongelo opo a ninge omunani gwoskola ndjika. Nonande oskola ndjino oya Tameka pondondo yotango sigo onti-7, oya kala yaana olugumbo lwoskola ethimbo ele, nomunani nguno okwali eya tulilepo olugumbo lwoshinanena, ta landa iilongitho ayihe ya pumbiwa.

Omukuluntuskola pOkanaimbula Simon Angula okwali a pandula Nekongo, ta holola kutya okweshi ningi oshipu opo iinima yawo moskola yi kale yili megameno.  Aanaskola oyali ya pewa oonzapo oshowo omapapa, gali ga gandjwa kwaamboka ya longa nawa ye vule yakwawo.

Styne Anne-Lucia oye ali a pewa epapa lyomunaskoladhingi , ngono a kangele ayehe no kwali a pewa omagano ogendji. Styne ta kumike aalongwa aakwawo ya longe nuudhiginini yo ya simaneke iilonga yoskola.

LEAVE A REPLY

Please enter your comment!
Please enter your name here