Okatanga otaka ka dhanwa mOnathinge poKrismesa

0
182

KuMaria Namupala

ONATHINGE- Aanyasha yomomudhingoloko Onathinge moshikandjohogololo Onayena oyena omadhiladhilo ogendji mo ku yambula po oonkalamwenyo dhawo noya hala okutyapula okrismesa pamwe.

Onathinge Youth Club oyo ongundu yaagundjuka yiimanga kumwe mewiliko lya Abed “Dube” Ashipala na Joseph Gumbo. Ashipala ngono a gandja uuyelele mbuno okwa holola kutya oya longekidha uudhano nenge otonamenda yowina tayi ithanwa Onathinge Annual Sports Tournament (OAST) ndjono ta yi kala hayi kalako kehe omvula.

“Uudhano mbuno twa longekidha owo uudhano twa tegelela tawu kala wopandjokonona oshoka opo lwotango momudhingoloko gwetu gwaNathinge tatu gongala pamwe no ku dhana uudhano mbuka, shika otwe shi ningi nelalakano lyokutya olundji aagundjuka ohaya kala owala yi itula miinima iiwinayi nolundji oyeli owala pomahala gomanwino mono tse aagundjuka itaatu kutha mosha shoka ta shi tungu,” Ashipala ta ti.

Otonamenda ndjino oya longekidhwa tayi ka kalako okuza momasiku 23-24 ga Desemba, no tawu kala tawu dhanwa kehe omvula,no tawu ka dhanenwa mpoka pwa tseyika nawa pOnathinge yOombike.   Otonamenda oya longekidha no ku unganekwa kaanyasha yomomudhingoloko gwaampoka

Aagundjuka mbano oya manga uukuni kumwe  yo ta yayi mule womadhiladhilo no ya mono kutya oshoopala opo ya kale ta ya longekidha uudhano woludhi nduka kehe mvula, yo ya tseyathane woo, no ku kundathana iinima mbyoka tayi tungu yo ya vule ya humithe komeho oonkalamwenyo dhawo.

“Otwa mono kutya oshihwepo oku Tameka nuudhano woludhi nduka  shi vulithe ku kala pomaundingosho, otwa tegelela nee oosipana dhopomudhingoloko ngaashi Uushinga,Oniingo,Iihongo,Omandongo,Oniimbwele, OnathingA&B nElombe , ashike omumvo ta guya otwa dhiladhila tu ka kale tuna oosipana odhindji lela nomaudhano ga yoolokathatha,” Ashipala ta gwedhapo.

Ashipala okwa gwedhapo tati uudhano mbuno wotango otawu kala wafa omalolelo yo ya tale nee kutya eitulemo lyaantu olili nana ngiini no konima taya yi komeho nawa. Konima yomaudhano otaku ka kala omainyanyudho mono aahikingalo yopomudhingoloko ngaashi Mokasie, Kelly, Omukondi, JLebron noyendji taya ka kutha ombinga no ku mwenyeka. Ashipala ota pandula kuku Media, Omukwa Investments oshowo A Bar limited mbono oyo ya yambidhidha no ku kwathela motonamenda ndjika, ta indile oshigwana shopomudhingoloko shi holoke sho shi yambidhidhe oshowo shi ondodhe omeho.

LEAVE A REPLY

Please enter your comment!
Please enter your name here