‘Shamha ngaa inandi nwa ondi li ngaa nawa, ndee shaanga nda nu onda hala ooMeme’

0
363

KuMatheus Hamutenya

MARIENTAL –  Ngeenge ina nwa omalodu, Paul Witbooi  iha dulu kuhola ovakainhu, ashike  ngee okwa makele mo, ohashi mu tu omukumo a ka hole naavo iha popifa shito.

Witbooi, okwa kala e shiivike nawa  kuvahapu have mu ula kutya okwa kulupila ko, hano keshi oipala. Hano eshi oshe mu etela opo a tameke okunwa omalodu nai, ye a dule okupopya novakainhu.

Shilishili, omulumenhu ou okwa kala ha kala ena omukumo ngee a nwa, nokwa kala ta holo ovakainhu, nokuya navo moixulo okati ka nangala.

Ashike modula 2009, Witbooi okwa  monika ombuto yoHIV nopaife ota ti; “Oshiima keshe tashi ya monghalamwenyo, ohashi  etelele omaupyakadi”.

Fiku ledimbuluko lomukifi  woAIDS mounyuni polukanda laTakarania moMariental, ta ti ngee okwa nwa omalodu oha dulu kuya momhalo na keshe ou e mu li poupepi”.

Eshi  a mona olutu laye la tumbuka  oinima itai veluka, 2009 okwa ya koshipangelo. Oidjemo yekonaakono oya koleka kutya  okwa umbata ombuto, Witbooi  ta ti okwe i tambula shaashi ita dulu kulundulula sha.

Eshi a hokolola onghalo yaye, Witbooi okwa  tokola kupukula oshiwana kenwo lomalodu nokuya moipala omo omunhu to dulu kukwatwa kombuto yoHIV. Okwa pukulul’oshiwana kotokele okunwa omalodu, shi longife eengumi okuya momhalo, nokukala omunhu u shii kuineekelwa.

Councilor woshikandjohoololo shaMariental, Barakiias Namwandi okwa kumaida oshiwana shomonhulilwa yaTakarania shi landule omayele nokukwata komesho mekandeko lombuto yoHIV moshiwana.

Namwandi okwa fatulula kutya, ekonndjifo loHIV/AIDS olomunhu keshe onghee oshiwana nashi longele kumwe  mokulwifa ombuto.”Kaku na epata inali kumwa komukifi moshilongo, ile modoolopa omu”. Osho a tumbula.

Warrant-Officer Karel Brandt  woshitai shopolifi yaMariental naye okwa tumbula nghee  enwo lomalodu unene moshitukulwa  la eta omikundu dihapu mwa kwatelwa HIV/AIDS. Ta denge omufindo kutya, ava ve na ookaume kokuya moipala vahapu ovo unene ve ninwe oshisho.

Okwa kumaida ovalumenhu vaha dalaadalife vali ovakainhu ounona nokuva fiya po, ndele ve va hombole po. “Inamu shendja vali ovakainhu vokuya navo moixulo mwa fa tamu shendje eedolombuluku” ta ti.

Okwa kumaida yo vali ovakainhu vaha nwe omalodu fiyo va kolwa ndee itava dulu nokweenda, voo va xulife okuleendela  omaufiku kwa toka nai tava dulu kukwatwa onghonga.

LEAVE A REPLY

Please enter your comment!
Please enter your name here